Azərbaycan, Bakı, 14 sentyabr / Trend , müxbir N.İsmayılova /
Azərbaycan İqtisadi İnkişaf Nazirliyi yanında İstehlak Bazarına Nəzarət üzrə Dövlət Xidməti istehlak bazarında növbəti monitorinqlərin keçirilməsi zamanı satışdan 140 kiloqramdan çox istifadə müddəti ötmüş qida məhsulları çıxarılaraq məhv edilib. Bu barədə bazar ertəsi nazirlikdən verilən məlumatda deyilir.
Monitorinqlər Bakının Binəqədi rayonunda, Xaçmaz və Sumqayıt şəhərlərində keçirilib.
Satışdan çıxarılmış məhsullar içərisində kolbasa və qənnadı məmulatları, bitki yağları, süd və süd məhsulları, balıq məhsulları, sərinləşdirici içkilər, pivə, eləcə də uşaq qidaları olub.
Bundan əlavə, Gəncə şəhərində satışdan 19,9 ton saxta sement götürülüb.
Qanun pozuntusuna yol vermiş 6 fiziki şəxs barədə inzibati xəta haqqında protokol tərtib edilib.
Ümumiyyətlə, 17 may 2009-cu il tarixindən "Azərbaycan Respublikası İnzibati Xətalar Məcəlləsinə dəyişiklik və əlavələr edilməsi haqqında" Azərbaycan Respublikasının Qanunu qüvvəyə mindikdən sonra aparılmış nəzarət tədbirləri zamanı qanun pozuntusuna yol verdiyi müəyyən edilmiş 47 hüquqi şəxsə 181 min manat, 412 fiziki şəxsə 615,5 min manat cərimə tətbiq olunub.
Sentyabrın 14-nə olan rəsmi məzənnə 0,8035 AZN/USD təşkil edir.
Məqalə müəllifi ilə əlaqə ünvanı: [email protected]
