Azərbaycan, Bakı, 30 sentyabr / Trend , müxbir Ü.İsmayılova /
"Qarant Sığorta" şirkətinin törəmə strukturu olan "Qarant Sığorta Agenti" iki yerli sığorta şirkəti ilə agent xidmətinin göstərilməsinə dair müqavilə imzalayıb. Bu barədə "Qarant Sığorta" şirkətinin İdarə Heyətinin sədri Vaqif Həsənov çərşənbə günü deyib.
"Beləliklə də indi şirkətin 3 tərəfdaşı var - "Qarant Sığorta" və digər iki şirkət", - Həsənov deyib. O, digər şirkətlərin adını açıqlamayıb.
Onun sözlərinə görə, müqavilə ona görə bağlanıb ki, təsisçi sığortasının bir növünün olmaması halında müştəri sığortasız qalmasın. Şirkət "Qarant Sığorta" kimi sığortalamaq hüququna malikdir.
"Qarant Sığorta Agenti" şirkəti təkcə "Qarant Sığorta" şirkəti üçün deyil, həmçinin bütün şirkətlərin və bazarın ümumi inkişafı məqsədi ilə yaradılıb", - Həsənov deyib.
"Qarant Sığorta" özünün sığorta agenti şirkətini iyul ayında yaradıb. Yeni şirkət sığorta vəsiqələrini əsasən özəl və fiziki şəxslərə satır. Şirkətin nizamnamə kapitalı 100 milyon manat həcmində müəyyənləşdirilib.
"Qarant Sığorta" 2007-ci ilin noyabr ayında Azərbaycanın Maliyyə Nazirliyindən sığorta fəaliyyəti üçün lisenziya əldə edib. Qarant Sığorta ZQAN Holdings-in tərkibinə daxildir. Şirkətin nizamnamə kapitalı 4 milyon manat təşkil edir. Şirkət sığortanın 18 könüllü və dörd icbari növü üzrə xidmət göstərir. Şirkətin haqqları yanvar-avqust aylarında 1,96 milyon, ödəmələri isə 0,13 milyon manat təşkil edib.
Sentyabrın 30-na olan rəsmi məzənnə 0,8035 AZN/USD təşkil edir.
Məqalə müəllifi ilə əlaqə ünvanı: [email protected]