Azərbaycan, Bakı, 17 fevral / Trend /
Bu ilin birinci rübündə Azərbaycanda yeni dəniz ticarət limanının quru hissəsinin inşasına başlanacaq. Bu barədə nəqliyyat naziri Ziya Məmmədovun "Azərbaycan" qəzetindəki məqaləsində deyilir. Yeni liman Ələt qəsəbəsində (Bakı yaxınlığında) yerləşəcək.
Məmmədovun sözlərinə görə, yeni limanın layihələndirilməsi üzrə tenderin qalibi olan Niderlandın "Royal Haskoning" şirkəti artıq limanın baş planını hazırlayıb. Hazırda işçi layihəsinin hazırlanması mərhələsi həyata keçirilir. Bu mərhələ bu ilin aprelində başa çatacaq.
Birinci fazanın inşa müddəti 3 ildir.
Bu liman multimodullu olacaq. Belə ki, logistik mərkəzdən əlavə, gələcəkdə bu ərazidə azad iqtisadi zonanın yaradılması planlaşdırılır.
Ələt qəsəbəsində yeni beynəlxalq dəniz limanının inşası 3 mərhələdə həyata keçiriləcək və 2015-ci ildə başa çatacaq. Layihənin birinci mərhələsi konteynerlərin, "ro-ro" tipli gəmilərin və adi (universal) quru yük gəmilərinin qəbulu üçün iki bərə və üç yük körpüsünün inşasını nəzərdə tutur. Layihənin ikinci mərhələsi daha 3 yük körpüsünün, üçüncü mərhələsi isə əlavə olaraq daha iki yük körpüsünün inşasını nəzərdə tutur. Layihə 400 milyon dollardan çox dəyərləndirilir.
Yeni limanda 11 körpü tikiləcək. Onlardan altısının inşası layihənin həyata keçirilməsinin birinci mərhələsində başa çatacaq. Liman 11,6 milyon tondan çox yük qəbul edə bilər.
Hazırda Xəzər dənizində cəmi 6 ticarət limanı fəaliyyət göstərir - Bakı (Azərbaycan), Türkmənbaşı (Türkmənistan), Aktau (Qazaxıstan), Həştərxan (Rusiya), Ənzəli və Neka (İran).