Azərbaycan, Bakı, 18 may /Trend, müxbir N.İsmayılova/
"Balaxanı LTD" MMC məişət tullantılarının yandırılması üzrə zavodun ərazisində məişət tullantılarının çeşidlənməsi üzrə yarımavtomat stansiyanın inşası ilə bağlı podratçının müəyyən edilməsi üçün tender elan ediləcək. Bu barədə "Təmiz şəhər" ASC-nin İdarə Heyətinin sədri Zakir İbrahimov çərşənbə axşamı bildirib.
"Hazırda texniki-iqtisadi əsaslandırma işlənib hazırlanır və iki ay ərzində podratçının seçimi üzrə tender elan ediləcək",- İbrahimov deyib.
Onun sözlərinə görə, Balaxanı poliqonu ötən əsrin 60-cı illərindən fəaliyyət göstərir və orada toplanmış məişət tullantılarının həcmi 60 milyon kubmetrə yaxın təşkil edir. "Hazırda zibilin qəbulu və onun zərərsizləşdirilməsi üçün kiçik sahə ayrılıb",- o deyib. - "Çeşidləyici stansiyanın işə salınmasından sonra çeşidlənmiş məişət tullantılarının həcminin artacağı gözlənilir. Bu gün Avropada zibilin 20-30 faizi təkrar emala göndərilir".
Dünya Bankı və ölkənin İqtisadi İnkişaf Nazirliyinin həyata keçirdiyi layihənin komponentlərindən biri Bakıda və yaxınlıqda yerləşən rayonlarda məişət tullantılarının utilizasiyası, eləcə də cari qanunvericilikdə düzəlişlərin edilməsi məqsədilə araşdırmaların aparılmasıdır.
"Bu gün biz mövcud qanunvericilik çərçivəsində işləyirik, zərurət yaranarsa, DB layihəsi çərçivəsində lazımi dəyişikliklər edilə bilər", - İbrahimov bildirib.
"Təmiz şəhər" ASC-nin planlarına ilin sonunadək bir yarımavtomat çeşidləyici stansiyanın alınması və quraşdırılması daxildir. Bu, təkrar emal üçün yararlı olan tullantıları çeşidləməyə kömək edəcək, tullantıların yerdə qalan hissəsi isə enerjinin əldə olunmasına yönəldiləcək.
"Balaxanı LTD" MMC məişət tullantılarının yandırılması üzrə zavod Balaxanı qəsəbəsində hazırkı poliqonun yaxınlığında 20 hektar ərazidə tikilir. Zavod ildə 500 min ton bərk məişət tullantıları istehsal edəcək. Bundan başqa, zavod yandırılması üçün ildə 10 min ton tibbi tullantıları qəbul edə biləcək. Tullantıların yandırılması nəticəsində ildə 231,5 milyon kilovat-saat həcmində elektrik enerjisi alınacaq və şəhər şəbəkəsinə göndəriləcək. Zavod 2012-ci ilin sentyabrında istismara veriləcək.
Zavodun inşasının ümumi dəyəri 36 aylıq tikinti dövrü də daxil olmaqla, 346 milyon avro həcmində dəyərləndirilir.