Azərbaycan, Bakı, 7 iyun /Trend, müxbir E.İsmayılov/
TRACECA nəqliyyat dəhlizinin (Avropa-Qafqaz-Asiya) hökumətlərarası komissiyasının səkkizinci iclası və sərmayə forumu oktyabr ayında Brüsseldə keçiriləcək. Bunu çərşənbə günü TRACECA-nın Azərbaycandan olan milli katibi Akif Mustafayev deyib.
Onun sözlərinə görə, sərmayə forumu oktyabrın 12-si, hökumətlərarası komissiyanın iclası isə oktyabrın 13-ü keçiriləcək.
"Əvvəlcə planlaşdırılıb ki, hökumətlərarası komissiyanın iclası sentyabrın axırında Moldovada keçiriləcək. Amma iştirakçıların rahatlığı məqsədilə hər iki tədbirin eyni yerdə keçirilməsi qərara alınıb", - bunu Mustafayev deyib.
Onun sözlərinə görə, hökumətlərarası komissiyanın iclasının Moldovada keçirilməməsinə baxmayaraq, iclas zamanı sədrlik Qırğızıstandan Moldovaya təhvil veriləcək.
Hal-hazırda TRACECA iştirakçısı olan dövlətlər bunlardır - Azərbaycan, Bolqarıstan, Gürcüstan, Qazaxıstan, Qırğızıstan, Ermənistan, Moldova, Rumıniya, Tacikistan, Türkmənistan, Türkiyə, Ukrayna və İran.
