Azərbaycan, Bakı, 7 iyun / Trend , müxbir E.İsmayılov/
Ələt qəsəbəsindəki (Bakı yaxınlığında) limanda beynəlxalq logistika mərkəzinin yaradılması üzrə layihə TRACECA nəqliyyat dəhlizinin (Avropa-Qafqaz-Asiya) oktyabrın 12-də Brüsseldə (Belçika) keçiriləcək investisiya forumunda iştirak üçün seçimdən keçib. Bu barədə bazar ertəsi TRACECA-nın Azərbaycandakı milli katibi Akif Mustafayev deyib.
Onun sözlərinə görə, TRACECA üzvü olan 13 ölkənin təqdim etdiyi 40 layihədən cəmi 23-ü seçimdən keçib.
Hazırda bu layihələrin foruma təqdim olunmasına hazırlanması üçün işlər görülür, eləcə də bütün lazımi formaların doldurulması, texniki-iqtisadi əsaslandırmanın hazırlanması, risklərin qiymətləndirilməsi və digər işlər üçün fəaliyyət həyata keçirilir. Bütün bunların hamısı investorların bu layihələrdə hansı işlərin görülməsinin nəzərdə tutulduğunu, zəruri investisiyaların həcminin necə olacağı, bu layihələrin reallaşdırılması zamanı risklər, nəticədə, hansı mənfəətin əldə olunacağını əyani görmələri üçün lazımdır.
Ələtdəki liman çoxmodullu olacaq. Çünki logistika mərkəzi ilə yanaşı, gələcəkdə bu ərazidə azad ticarət zonasının yaradılması da planlaşdırılır.
Ələt qəsəbəsində yeni beynəlxalq dəniz limanının inşası 3 mərhələdə həyata keçiriləcək və 2015-ci ildə başa çatacaq. Layihənin birinci mərhələsi konteynerlərin, "ro-ro" tipli gəmilərin və adi (universal) quru yük gəmilərinin qəbulu üçün iki bərə və üç yük körpüsünün inşasını nəzərdə tutur. Layihənin ikinci mərhələsi daha 3 yük körpüsünün, üçüncü mərhələsi isə əlavə olaraq daha iki yük körpüsünün inşasını nəzərdə tutur. Layihə 400 milyon dollardan çox dəyərləndirilir.
Yeni limanda 11 körpü tikiləcək. Onlardan 6-nın inşası layihənin həyata keçirilməsinin birinci mərhələsində başa çatacaq. Liman 11,6 milyon tondan çox yük qəbul edə bilər.
Hazırda Xəzər dənizində cəmi 6 ticarət limanı fəaliyyət göstərir - Bakı (Azərbaycan), Türkmənbaşı (Türkmənistan), Aktau (Qazaxıstan), Həştərxan (Rusiya), Ənzəli və Neka (İran).
