Azərbaycan, Bakı, 26 iyul /Trend, müxbir İ.Xəlilova/
Yaxın beş il ərzində Azərbaycanın sığorta bazarında ciddi dəyişiklik gözlənilmir. "Alfa Sığorta" sığorta şirkətinin Direktorlar Şurasının sədri Xəyal Məmmədxanlı belə hesab edir.
"Əgər Azərbaycanda sığorta sahəsində yanğın sığortası kimi yeni qanunvericilik aktları qəbul olunmasa, yaxın iki ildə ölkənin sığorta bazarında hansısa yeni mexanizm gözləmək qeyri-realdır və ciddi artım da gözləmək lazım deyil", - Məmmədxanlı deyib.
Onun fikrincə, ölkə hökuməti təbii fəlakətlər nəticəsində dəyən zərərə görə təzminatların ödənilməsindən əl çəkməlidir, belə ki, bunun sığorta şirkətlərinə verilməsi vaxtı gəlib çatıb.
"Əhalini öz mülkiyyətini sığortalamağa stimullaşdırmaq və ya məcbur etmək lazımdır ki, gözlənilməz vəziyyətdə sığortaçılar dəymiş ziyanı ödəyə bilsinlər. Dünya praktikasında belə növ ziyanlar dövlət deyil, sığorta şirkətləri tərəfindən ödənilir", - Məmmədxanlı qeyd edib.
Onun fikrincə, bununla yanaşı, müştərilərin aldadılması ilə bağlı hallar, bəzi şirkətlərin sığortanı ödəməməsi indiyədək bazarda əhalinin inamını qazanmaq üçün edilənlərin hamısını puç edir. Bu inamın qorunması üçün yeganə yol sığorta halları üzrə ödənişlər etmək, müştərilərin hüququnu pozmamaqdan ibarətdir. Yalnız bütün bu şərtlər yerinə yetiriləcəyi halda sığorta bazarında artım gözləmək olar.
Onun sözlərinə görə, Azərbaycanın sığorta bazarı ortamüddətli perspektivdə və əlverişli şəraitdə ildə 5-10 faiz səviyyəsində artacaq.
"Düşünmürəm ki, ölkənin sığorta bazarı iki-üç dəfə artacaq. O, "İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında" yeni qanunun tətbiq ediləcəyi, eləcə də icbari sığorta növlərinin effektivliyinin artırılması halında 5-10 faiz arta bilər. Hər bir halda, bazarın həcmi yaxın iki ildə çətin ki 200 milyon manatı ötsün", - Məmmədxanlı qeyd edib.
Onun fikrincə, belə proqnozlar Azərbaycanda həyat sığortasının inkişafı üçün təxminən 3-4 ilin lazım olması ilə əlaqədardır.
Sığorta bazarının inkişafı üçün Azərbaycan Sığortaçılar Assosiasiyasının (ASA) fəaliyyətinin yaxşılaşdırılması da tələb olunur.
2010-cu ilin birinci yarısının yekunlarına görə, sığorta şirkətləri tərəfindən 76,88 milyon manat məbləğində sığorta haqqı yığılıb ki, bu da ötən ilin müvafiq dövrü ilə müqayisədə 3,8 faiz azdır. Bununla yanaşı, hesabat dövründə ödənişlər 8,8 faiz azalaraq 22,5 milyon manat təşkil edib.
İyulun 26-na olan rəsmi məzənnə 0,8036 AZN/USD təşkil edir.
