Azərbaycan, Bakı, 17 avqust /Trend, müxbir N.İsmayılova/
2010-cu il avqustun 13-də Hesablama Palatasının növbəti kollegiya iclası keçirilib. Bu barədə palatanın məlumatında deyilir.
İclasda Azərbaycan Respublikası Vergilər Nazirliyinin 3 saylı Ərazi Vergilər İdarəsində vergi qanunvericiliyinə riayət edilməsi, Meliorasiya və Su Təsərrüfatı ASC-nin Salyan Suvarma Sistemləri İdarəsinə və Baş Mil-Muğan Kollektorlar İstismarı İdarəsinə dövlət büdcəsinin "Kənd təsərrüfatı, meşə təsərrüfatı, balıqçılıq, ovçuluq və ətraf mühitin mühafizəsi" bölməsi üzrə "Meliorasiya tədbirləri" paraqrafından ayrılan vəsaitlərin proqnozlaşdırılması və istifadəsi, Azərbaycan Respublikası Dövlət Neft Fondu vəsaitinin idarə olunması və istifadəsi, eləcə də, Azərbaycan Respublikası Dövlət Sosial Müdafiə Fondunun Qazax rayon şöbəsinin gəlir və xərclərinin proqnozlaşdırılması və icrası ilə bağlı auditin nəticələrinə dair hesabat və rəylər geniş müzakirə olunaraq təsdiq edilib.
Kollegiya iclasında, həmçinin, Bakı şəhəri Nəsimi Rayon İcra Hakimiyyətinin Mənzil-Kommunal Təsərrüfatı Birliyinə dövlət büdcəsinin "Mənzil və kommunal təsərrüfatı" bölməsindən ayrılan vəsaitlərin proqnozlaşdırılması və istifadəsi, Azərbaycan Respublikası Ekologiya və Təbii Sərvətlər Nazirliyinə dövlət büdcəsindən ayrılan vəsaitlərin və hökumət zəmanəti ilə cəlb edilən kreditlərin istifadəsi, eləcə də, dövlət büdcəsindən Azərbaycan Respublikası Standartlaşdırma, Metrologiya və Patent üzrə Dövlət Komitəsinin saxlanılmasına ayrılan vəsaitlərin istifadəsinə dair audit proqramları da təsdiq olunub.
