Azərbaycan, Bakı, 23 avqust /Trend, müxbir S.Süleymanov/
Qazaxıstan indiki marketinq ilində Rusiyaya 1,5 - 2 milyon ton taxıl tədarük edə bilər. Bu barədə Trend-ə müsahibəsində Milli Şirkət "Prodkorporasiya" SC-nin kommersiya məsələləri üzrə idarəedici direktoru Daulet Uvaşev deyib.
"Qazaxıstan indiki marketinq ilində Rusiyaya 1,5 - 2 milyon ton taxıl tədarük edə bilər. Söhbət əsasən qonşu dövlətin Asiya hissəsindən gedir. Bu, Çelyabinsk və Omsk vilayətləridir", - Uvaşev qeyd edib.
Ümumilikdə Qazaxıstanda hazırkı marketinq ilində taxıl potensialı 8 milyon ton təşkil edəcək.
Bundan əvvəl verilən məlumata əsasən, Uvaşevin sözlərinə görə, indiki marketinq ilində Qazaxıstan ixracda, Əfqanıstan və Cənubi Qafqaz daxil olmaqla, Orta Asiya respublikalarına böyük diqqət yetirmək niyətindədir.
"Əgər bir qədər artırsaq, Əfqanıstanda bizim həcm bu il 500-800 min tondan bir milyonadək yüksələcək. Biz Orta Asiya bazarına təxminən 2 milyon taxıl və 2 milyon un çıxara bilərik", - Uvaşev vurğulayıb.
Onun sözlərinə görə, bu il Azərbaycanın taxıl tələbatı 1,2 - 1, 3 milyon ton təşkil edir. Gürcüstanın tələbatı isə təxminən 800 min tondur.
"Qazaxıstan bu həcmi Cənubi Qafqaz respublikalarına Rusiya və Ukraynadan tədarükün azaldığı bir zamanda sakitcə ödəyə bilər. Əgər biz indiki vəziyyətdən istifadə etməsək, Cənubi Qafqaz respublikaları başqa tədarükçülər axtaracaqlar", - Uvaşev bildirib.