Azərbaycan, Bakı, 22 dekabr /Trend, müxbir E.İsmayılov/
Proqnozlara əsasən, bu il "Azərbaycan Dəmir Yolları" QSC 5,9 milyondan çox sərnişn daşımağı planlaşdırır. Bu barədə çərşənbə günü QSC-dən bildiriblər.
Mənbənin sözlərinə görə, yanvar-noyabrda QSC tərəfindən 4,45 milyon sərnişin daşınıb ki, bu da proqnozlaşdırılandan 24,5 faiz azdır.
Onun sözlərinə görə, sərnişin axını əsasən Rusiya istiqamətində və bu ölkədən keçən digər marşrutlarda müşahidə olunub. Bu istiqamətdə sərnişin axınının azalması son vaxtlar Dağıstan ərazisində baş verən partlayışlarla əlaqədardır.
"Sərnişin axının azalması əsasən şimal istiqamətində müşahidə edilir. Bu, sərnişinlərin Dağıstan ərazisində partlayışlardan ehtiyat etmələri ilə əlaqədardır", - mənbə qeyd edib.
Dövlət Statistika Komitəsinin məlumatına əsasən, yanvar-noyabrda Azərbaycanın nəqliyyat sektoru tərəfindən 179,9 milyon ton müxtəlif yük daşınıb, eləcə də 1,3 milyard sərnişin aparılıb.
