Azərbaycan, Bakı, 22 dekabr /Trend, müxbir A.Axundov/
Türkiyə və Azərbaycan əməkdaşlığın inkişafı üçün mövcud imkanlardan effektiv istifadə etməyə çalışırlar və Azərbaycan Türkiyə iqtisadiyyatında iri sərmayədar olmaq üçün əlverişli şəraitə malikdir. Bu barədə çərşənbə günü Trend-ə Türkiyə Böyük Millət Məclisinin (TBMM) Sənaye, ticarət, energetika, təbii ehtiyatlar və informasiya texnologiyaları komissiyasının rəhbəri, hakim Ədalət və İnkişaf Partiyasından deputat Həsən Əli Çelik telefonla bildirib.
Azərbaycan Dövlət Statistika Komitəsinin məlumatına görə, yanvar-oktyabr aylarında iki ölkə arsında mal dövriyyəsi təxminən 750 milyon dollar təşkil edib. 2009-cu ildə bu rəqəm bir milyard dollar olub, o zaman Azərbaycandan ixrac 107 milyon dollar təşkil edib.
"Türkiyə enerji resurslarının tədarükçüsü olan ölkələrlə Avropanın nəhəng istehlak bazarları arasında yerləşir. Bu fakt, eləcə də iqtisadi inkişaf və siyasi sabitlik onu həm enerji sektoruna, həm də digər sahələrə sərmayələr yatırmaq üçün çox əlverişli ölkə edir. Yaxın 10 ildə Azərbaycanın Türkiyədə ən iri investor olacağı ilə bağlı perspektiv tamamilə realdır və bunun üçün bütün şərait var", - Çelik deyib.
SOCAR&TURCAS şirkətinin icraçı direktoru və "Petkim" iri neft-kimya kompleksinin idarə heyətinin üzvü Kənan Yavuz hesab edir ki, yaxın beş il ərzində Azərbaycan Türkiyədə ən iri investor olacaq. Bir müddət əvvəl Yavuzun dediyi kimi, 2015-ci ilədək SOCAR&TURCAS və "Petkim"in birgə investisiyaları beş milyard dollar təşkil edəcək, 2020-ci ildə isə "Petkim" Türkiyədə ən iri sənaye istehsalçısı olacaq.
Deputat Çelikin sözlərinə görə, Türkiyə azərbaycanlı sərmayədarları qeyri-neft sektorunda görmək istərdi.
"Türkiyədə maşınqayırma, eləcə də avtomobil sektoru, tekstil və qida sənayesi sürətlə inkişaf edir. Biz azərbaycanlı sərmayədarları bu sahələrin müxtəlif istiqamətlərində görmək istərdik", - Çelik bildirib.
Onun sözlərinə görə, dekabrın 21-23-də İstanbulda keçirilən İqtisadi Əməkdaşlqı Təşkilatının (İƏT) sammiti həm Azərbaycanla Türkiyə arasında, həm də ümumilikdə regionda əməkdaşlığı daha da möhkəmləndirəcək.
"Əminəm ki, hər iki tərəf bu görüşlərdən əldə olunacaq imkanlardan istifadə edəcək", - Çelik qeyd edib.
İqtisadi Əməkdaşlıq Təşkilatı İran, Pakistan və Türkiyə tərəfindən 1985-ci ildə yaradılan İnkişaf üçün Regional Əməkdaşlıq Təşkilatının hüquqi varisi olan hökumətlərarası regional təşkilatdır. Təşkilatın tərkibinə Azərbaycan, Əfqanıstan, Tacikistan, Türkmənistan, Qazaxıstan, Qırğızıstan və Özbəkistan da daxildir.
Dekabrın 23-də İstanbulda təşkilatın dövlət və hökumət başçılarının 11-ci görüşü keçiriləcək. Bu görüşdən əvvəl dekabrın 21-22-də İstanbulda İƏT üzvü olan ölkələrin Nazirlər Şurasının görüşü və əsas vəzifəli şəxslərin yüksək səviyyədə iclası keçiriləcək.
