Azərbaycan, Bakı, 23 dekabr /Trend, müxbir İ.Xəlilova /
Almaniya İnkişaf Bankı KfW gələn ildən Azərbaycan hökuməti ilə Gəncə və Şəki şəhərlərində su təchizatı və kanalizasiya sistemlərinin bərpası layihəsinin ikinci fazasının həyata keçirilməsi üçün əlavə maliyyələşdirmənin təqdim edilməsi ilə bağlı müzakirələrə başlamağı planlaşdırır. Bu barədə cümə axşamı Trend-ə KfW-nin Bakı ofisinin rəhbəri Natiq Abdullayev məlumat verib.
"Əlavə maliyyələşdirmənin verilməsi birinci faza çərçivəsində tikinti işlərinin başlamasından sonra mümkün olacaq. Hazırda Şəkidə tikinti işlərinə başlanılıb, 2011-ci ilin martından isə Gəncə şəhərində başlanılması gözlənilir, bununla əlaqədar yanvarda artıq podratçının müəyyən edilməsi üzrə tenderin elan olunması mümkündür", - Abdullayev deyib.
Gəncə və Şəki şəhərlərinin su təchizatı və kanalizasiya sistemlərinin tam bərpası üzrə tədbirlərin davam etdirilməsi üçün alman hökuməti artıq 63 milyon avro vəsaitin verilməsini təsdiqləyib. Bank əlavə maliyyələşdirmədən ikinci mərhələnin həyata keçirilməsinə görə Gəncə şəhərinin su təchizatı sisteminin tam bərpası üçün nəzərdə tutulan 30 milyon avroluq ümumi məbləğdən 23 milyon avro ayırmağı planlaşdırır. Üçüncü mərhələdə bank çirkab suların təmizlənməsi üçün müasir təmizləmə qurğusuna 40 milyon avro ayırmaq niyyətindədir.
Layihənin 3,5 il ərzində həyata keçirilməsi nəzərdə tutulub. Layihənin birinci fazası Şəkinin 100 faiz , Gəncənin 50 faiz su ilə təmin edilməsini nəzərdə tutur. Gəncənin su təchizatı sisteminin gələcək inkişafı ikinci fazada həyata keçiriləcək.
Layihə Gəncə və Şəki şəhərlərinin su təchizatı və kanalizasiya sistemlərinin keyfiyyətinin və etibarlılığının artırılmasını nəzərdə tutur. Layihənin birinci fazasının büdcəsi 55 milyon avro təşkil edir. 2006-cı ilin oktyabrında Börndə imzalanan sazişlərə uyğun olaraq, KfW layihənin reallaşdırılması üçün 37 milyon avro , İqtisadi Məsələlər üzrə İsveçrə Dövlət Katibliyi (SECO) qrant formasında 10 milyon avro ayırıb. Layihədə Azərbaycan hökumətinin payı 8 milyon avro təşkil edir. SECO-nun vəsaiti hesabına Şəkinin infrastrukturunun qismən bərpası və konsaltinq xidmətlərinin ödənilməsi, eləcə də avadanlıqların alınması həyata keçiriləcək.
