Azərbaycan, Bakı, 10 yanvar /Trend, müxbir Ü.İsmayılova/
Azərbaycanın "Günay Sığorta" şirkəti yaxın vaxtlarda kapitalını 1,2-1,3 milyon manat artırmağı planlaşdırır. Bu barədə bazar ertəsi şirkətin idarə heyəti sədri səlahiyyətlərinin müvəqqəti icraçısı Vüqar Rəcəbov bildirib. Hazırda şirkətin nizamnamə kapitalı 2 milyon manat təşkil edir.
"Hazırda kapitalın artırılması məsələsi şirkətin səhmdarları ilə müzakirə olunur. Kapital bütünlüklə fəaliyyətdə olan səhmdarın vəsaitləri hesabına artırılacaq", - Rəcəbov bildirib.
1992-ci ildən fəaliyyət göstərən "Günay Sığorta" şirkətinin yeganə səhmdarı Azərbaycanın "Günay Bank" səhmdar bankıdır. 2010-cu ilin yanvar-noyabr ayları ərzində şirkətin mükafatları 0,63 milyon manat, ödənişləri isə 0,14 milyon manat təşkil edib.
Azərbaycanın Maliyyə Nazirliyinin minimum tələblərinə uyğun olaraq, 2011-ci il yanvarın 1-dən sığorta şirkətlərinin kapitalı üç milyon manat təşkil etməlidir.
Ötən il "Günay Sığorta" şirkətinin kapitallaşma ilə bağlı problemləri olub. Bunun nəticəsində 2010-cu il mayın 7-də şirkətin lisenziyası dayandırılıb və bu, DSNX-nin sığorta qanunvericiliyinin müəyyən etdiyi ödəniş qabiliyyətlilik normativlərinin və sığortaçıların maliyyə sabitliyi üzrə tələblərinin yerinə yetirilməməsi ilə izah olunub. Şirkətin lisenziyası 2010-cu il avqustun 30-da əvvəllər şirkətin fəaliyyətində aşkar edilən pozuntuların aradan qaldırılması ilə əlaqədar bərpa olunub.
Yanvarın 10-na rəsmi məzənnə 0,7976 AZN/USD təşkil edir.
