Azərbaycan, Bakı, 9 fevral /Trend, müxbir N.İsmayılova/
Beynəlxalq Valyuta Fondu (BVF) və Azərbaycan Mərkəzi Bankı (AMB) ölkədə milli valyutanın məzənnəsinin daha çevik idarə edilməsinə keçid imkanını müzakirə edirlər. Bu barədə BVF-nin Yaxın Şərq və Mərkəzi Asiya regionu üzrə rəhbərinin müavini, missiyanın Azərbaycandakı rəhbəri Nadim İlahi çərşənbə günü Bakıda "İRƏLİ" İctimai Birliyinin nümayəndələri ilə görüşdə deyib.
"BVF Azərbaycana büdcə prosesinin təkmilləşdirilməsi və milli valyutanın daha çevik məzənnəsinə keçid sahələrində texniki dəstək göstərir", - İlahi bildirib.
Onun sözlərinə görə, milli valyutanın müəyyən edilmiş məzənnəsinin öz üstünlüklərinə malik olmasına və inflyasiyanın tənzimlənməsi üçün alət olmasına baxmayaraq, Azərbaycanda daha çevik valyuta məzənnəsinə keçid həyata keçirilməlidir. Onun fikrincə, keçid həyata keçirilməsə, iqtisadiyyat şoklara həsas olacaq və dövlət büdcəsində qeyri-neft sektorunun defisiti artacaq.
"BVF Maliyyə, İqtisadi İnkişaf nazirlikləri və Mərkəzi Bankın rəhbərlikləri üçün ölkədə maliyyə sektoruna nəzarətin təkmilləşdirilməsi məqsədilə treninqlər keçirir", - o, əlavə edib.
İlahinin sözlərinə görə, Azərbaycan qlobal iqtisadi böhrandan uğurla çıxan ölkədir və hazırda onun iqtisadiyyatının şaxələnməsi üçün insan kapitalına investisiya yatırmaq lazımdır.
"Azərbaycanın Dövlət Neft Fondu hazırda dünyada oxşar qurumlar arasında fəaliyyət göstərən uğurlu strukturlardan biridir və ölkə hökuməti artıq indi bu vəsaitlər hesabına iqtisadiyyatın şaxələndirilməsinin zəruriliyi barədə düşünür", - o, vurğulayıb.