Azərbaycan, Bakı, 3 mart /Trend, müxbir Ü.İsmayılova/
Azərbaycan Dövlət Şəhərsalma və Arxitektura Komitəsi Bakının mərkəzi hissəsinin, eləcə də "Sovetski" adı ilə məşhur olan ərazisinin dəqiq planını hazırlayır. Bu barədə cümə axşamı Dövlət Komitəsi sədrinin müavini Dövlətxan Dövlətxanov bildirib.
"Hazırda şəhərin bu hissəsində istismar müddəti bitmiş yaşayış sahələri var, onların artıq 100 ilə yaxın yaşı var", - Dövlətxanov bildirib.
Onun sözlərinə görə, bütün bu tikililər qəza vəziyyətindədir və bununla əlaqədar dəqiq plan hazırlanacaq. "Bakıdövlətlayihə" İnstitutu tərəfindən hazırlanan layihə planı 2011-ci ilin may-iyun aylarında başa çatdırılacaq.
Bu dövrədək planın bir neçə variantı hazırlanacaq, Dövlət Komitəsi bu proses barədə ictimaiyyətin məlumatlandırılması üçün bu işlərin geniş sərgisini təşkil edəcək.
"Bu ərazidəki tikililərin sökülməsi məsələsi burada yaşayan adamları ciddi narahat etsə də, diqqətə çatdırmaq istəyirəm ki, DK tərəfindən qərar qəbul edilərkən ictimaiyyətin fikri nəzərə alınacaq", - Dövlətxanov bildirib.
Onun sözlərinə görə, plan təkcə söküntünü deyil, eləcə də yenidənqurma və möhkəmləndirmə işlərini də nəzərdə tutur.
Dövlətxanovun sözlərinə görə, plan 20 illik dövrü əhatə edəcək, çünki söküntü, yenidənqurma və bərpa işləri uzun prosesdir və onlar investorların cəlb edilməsi hesabına həyata keçiriləcək.
