Azərbaycan, Bakı, 9 mart /Trend, müxbir Ü.İsmayılova/
Fevralda Bakının təkrar mənzil bazarında orta qiymətlər iki faiz ucuzlaşaraq bir kvadratmetr üçün 1007 dollar olub. Yanvarda bu göstərici 1028 dollar təşkil edib. Bu barədə çərşənbə günü "Əmlak Bazarı İştirakçıları" İctimai Birliyindən bildiriblər.
Bazarda baş verən proseslər mənzil tikintisi templərinə mənfi təsir göstərib ki, bu da yenitikililərin reabilitasiyası və onların dövriyyəyə verilməsi üçün imkanların məhdudlaşmasına gətirib çıxarıb.
Məlumatda deyilir ki, ay ərzində Bakı rayonlarının heç birində qiymət artımı müşahidə olunmayıb.
Bazara orta qiymətdən aşağı təklif olunan təkrar mənzillərin payı 58,2 faiz olub.
Fevralda təkrar mənzil bazarında otaqların orta göstəricisi 2,61, otaqların orta satış qiyməti 44 561 dollar, mənzillərin orta qiyməti isə 112 452 dollar olub.
Təkrar bazarda qiymətlərin indeksi 3,8 bənd azalaraq 185,4 bənd təşkil edib.
Təkliflərin həcmi 0,1 faiz artıb və nəticədəc bazarda təklif olunan mənzillərin sayı 7 minə yaxın olub. Təkrar mənzil bazarında sövdələşmələrin bağlanması dinamikasında 0,7 faizlik artım müşahidə olunub.
Bakıda mənzil bazarında yeni tikililərin payı fevralda 61,2 faiz təşkil edib.
Bakının təkrar mənzil bazarında aktivlik əmsalına görə, ən cəlbedici rayonlar Xətai və Yasamal rayonları olub. Təşkilatın ekspertlərinin hesablamalarına görə, bazarın ümumi portfelində Nəsimi, Nərimanov və Xətai rayonlarının payı 79,4 faiz təşkil edib.
Təkrar bazarda təkliflər portfelinin əsasən Bakının bu dörd rayonu üzrə formalaşması həmin rayonlarda təkrar mənzil bazarında yenitikililərin payının artması ilə əlaqədardır. Araşdırma göstərir ki, ilkin bazarın təkliflər paketi də əsasən bu rayonların hesabına formalaşır.
