Azərbaycan, Bakı, 11 mart /Trend, müxbir Trend T.Cəfərov/
İranda qeyri-neft sektoru üzrə ixracın həcmi artır və ümid edirik ki, ilin sonunadək (İranda il martın 21-də dəyişir) xidmət sahəsində ixrac həcmi 40 milyard dollara çatacaq. Trend-in məlumatına görə, bu barədə İranın Ticarət İnkişafı Təşkilatının sədr müavini Kiyumərs Fətullah Kirmanşahi İRNA agentliyinə deyib.
"Xidmət sahəsində ixracat əsasən 11 sahəni, o cümlədən texniki və mühəndislik, turizm, rabitə texnologiyası, yük və sərnişin daşımaları və digər sahələri əhatə edir", - Kirmanşahi deyib.
O, əlavə edib ki, cari ilin ötən 11 ayı ərzində qeyri-neft sektoru üzrə ixracat qaz kondensatı hesablanmaqla 29 milyard dollar və qaz kondensatını çıxmaqla 24 milyard dollar təşkil edib.
"Cari ilin ötən 11 ayı ərzində 58 milyard dollar həcmində məhsul idxal olunub. Bu rəqəmdən 6 milyard dolları qızıl, 2,5 milyard dolları isə benzinə aiddir", - Kirmanşahi deyib.
İranın ixracat üzrə işçi qrupu martın 1-də keçirdiyi iclasda ölkənin qeyri-neft sektorunun inişafı üzrə milli strategiyanı təsdiq edib. İnkişaf strategiyası İranın 2025-ci ilədək perspektiv inkişaf proqramı, Konstitusiyanın özəlləşdirməyə dair 44-cü maddəsinin tələbələri, üçüncü və dördüncü beşillik inkişaf proqramlarına uyğun formada hazırlanıb. İran yeni strategiyada ixrac və idxal həcmini bərabərləşdirmək, iqtisadi layihələrdə özəl sektorun payını artırmaq, istehsalatda ixracın həcmini artırmaq, enerji tranzitində İranın idarəetmə rolunu, ixrac potensialını artırmaq, region ölkələrinin dəstəyi ilə müstəqil sığorta, bank və pul müəssisələrinin fəaliyyətini təmin etmək kimi məsələləri planlaşdırır.
