Azərbaycan, Bakı, 22 aprel /Trend, müxbir N.İsmayılova/
Çexiyanın "Dvorak Engineering" şirkəti və Azərbaycanın çörək istehsalı ilə məşğul olan "Serham" şirkəti avadanlıqların alınması barədə müqavilə imzalayıblar. Bu barədə cümə günü Trend-ə "Serham" şirkətinin baş direktoru Rasim Nəbiyev məlumat verib.
"Bundan əvvəl Sahibkarlığa Kömək Milli Fondu yeni avadanlıqların alınması üçün 500 min manat məbləğində güzəştli kredit ayırıb ki, həmin avadanlıqlar artıq müəssisədə uğurla istismar olunur", - o bildirib.
Onun sözlərinə görə, nəticədə çörəyin istehsal həcmi gündə 10 min ədədədək artıb, həmçinin, istehsalın keyfiyyəti xeyli artıb və 30 yeni iş yeri açılıb.
"Hazırda biz "Dvorak Engineering" şirkəti ilə istehsalın genişləndirilməsi məqsədilə avadanlıqların alınması haqqında müqavilə imzalamışıq", - Nəbiyev bildirib.
Apreldə Azərbaycan İqtisadi İnkişaf Nazirliyi yanında SKMF ölkədə çörək istehsalında müasir texnologiyaların tətbiqi məqsədilə Bakıda Çexiyanın "Dvorak Engineering" şirkətinin avadanlıqlarının təqdimatını keçirib.
"Serham" şirkətinin ildə 29,2 min ton məhsul gücə malik çörək zavodu Bakının Bakıxanov qəsəbəsində yerləşir.
Aprelin 22-nə olan rəsmi məzənnə 0,7917 AZN/USD təşkil edir.
