Azərbaycan, Bakı, 5 may /Trend, müxbir İ.Xəlilova/
Özəl Sektorun İnkişafı üzrə İslam Korporasiyasının (ICD - İslam İnkişaf Bankı qrupuna daxildir) təsis etdiyi Azərbaycanın lizinq şirkəti "Ansar Leasing" yaradıldıqdan sonra ilk dəfə olaraq ili gəlirlə başa vurmağı planlaşdırır. Bu barədə Trend-ə cümə axşamı şirkətin baş direktoru Ceyhun Nağıyev deyib.
"Hazırda şirkət artıq 200 min manat qazanıb, ilin yekunları üzrə 800 min manat gəlirin əldə olunacağı gözlənilir", - Nağıyev bildirib.
Onun sözlərinə görə, bu vəsaitlər şirkətin ehtiyat fondunun yaradılmasına, dividendlərin ödənilməsinə və şirkətin fəaliyyətinin inkişafına yönələcək.
"Biz bazara çıxanda o, boş idi və əsas oyunçular aktiv fəaliyyəti dayandırmışdılar, - Nağıyev qeyd edib. - Hazırda ölkənin lizinq bazarı yendiən artmağa başlayıb, bu isə şirkətin gələcək inkişafını zəruri edir".
Şirkət fəaliyyətə 2009-cu il iyunun sonunda başlayıb, ilk müqavilələrin bağlanması isə həmin ilin oktyabrında baş tutub.
"Bu günə şirkətin qüvvədə olan 200 müqaviləsi var", - Nağıyev vurğulayıb.
Onun sözlərinə görə, "Ansar Leasing"in portfelinin 20 faizi daşınmaz əmlakın, 20 faizi nəqliyyat vasitələrinin, 20 tikinti texnikasının, 20 faizi avadanlıq, 20 faizi isə digər növlərin lizinqinin payına düşür.
"Gələcəkdə şirkətin portfelində daşınmaz əmlakın lizinqinin payı artacaq. Belə ki, bu, daha az riskli istiqamətdir", - Nağıyev hesab edir.
Nağıyevin sözlərinə görə, şirkətin hələ ki nizamnamə kapitalının və təsisçilərin tərkibinin dəyişdirilməsi ilə bağlı planları yoxdur.
"Nizamnamə kapitalının səviyyəsinə görə (5 milyon manat və ya 6,2 milyon dollar) şirkət ölkənin lizinq qurumlarının ən kapitallaşdırılmış şirkətidir", - "Ansar Leasing"in rəhbəri bildirib.
Azərbaycan Vergilər Anzirliyi 12 dekabr 2008-ci ildə "Azərbaycan Lizinq Şirkəti" MMC-nin (ticarət markası "Ansar Leasing") dövlət qeydiyyatını "bir pəncərə" prinsipi üzrə aparıb. Yeganə təsisçi kimi Özəl Sektorun İnkişafı üzrə İslam Korporasiyası çıxış edir. "Ansar Leasing" fəaliyyətə 29 iyun 2009-cu ildə başlayıb.
Özəl Sektorun İnkişafı üzrə İslam Korporasiyası 1999-cu ildə Ciddədə, İİB Direktorlar Şurasının 24-cü illik toplantısında yaradılıb. ICD-nin baş qərargahı Səudiyyə Ərəbistanının Ciddə şəhərindədir.
ICD-nin səlahiyyətlərinə üzv ölkələrin iqtisadi inkişafına şəriət prinsiplərinə uyğun olaraq özəl sektorun inkişafının dəstəklənməsi vasitəsilə yardım edilməsi daxildir. Özəl Sektorun İnkişafı üzrə İslam Korporasiyası özəl müəssisələrin yaradılması, genişləndirilməsi və modernləşdirilməsinə yardım edilməsi üçün hökumət və özəl qurumlara məsləhətlər də verir.
İİB 20 oktyabr 1975-ci ildə yaradılıb. Mənzil-qərargahı Ciddə şəhərindədir. Bankın regional ofisləri Rabatda, Kuala-Lumpurda var. İİB-in Almatıda da ofisi var.
Mayın 5-nə olan rəsmi məzənə 0,7912 AZN/USD təşkil edir.
