Azərbaycan, Bakı, 20 may /Trend, müxbir A.Axundov/
Azərbaycanın "Başak-İnam Sığorta Şirkəti" 2011-ci ildə 4 milyon manat məbləğində sığorta haqqı yığmağı planlaşdırır. Bu barədə Trend-ə cümə günü şirkətin baş direktoru Orxan Həsənov deyib.
Azərbaycan Maliyyə Nazirliyi yanında Dövlət Sığorta Nəzarəti Xidmətinin məlumatına görə, 2010-cu ildə şirkətlərin yığımları 2,6 milyon manat, ödənişləri isə 1,5 milyon manat təşkil edib. 2011-ci ilin yanvar-aprelində yığımlar artıq 1,086 milyon manata, ödənişlər isə 0,359 milyon manata çatıb.
2011-ci ilin ilk dörd ayı ərzində şirkətlərin yığımı ötən ilin analoji dövr göstəricisi ilə müqayisədə 42 faiz, ödənişlər isə 35 faiz artıb.
Sığorta haqqlarının artımı KASKO sığortası (4,5 faiz), elektron ləvazimatların sığortası (10,2 faiz), şüşə sınması sığortası (40 faiz), fərdi qəza və xəstəlik sığortası (160 faiz), sağlamlıq sığortası (84 faiz) və s. növlərdə olub.
Sığorta ödənişlərindəki artım isə KASKO sığortası (62 faiz), nəqliyyat vasitəsi sahiblərinin mülki məsuliyyətinin sığortası (24 dəfə), şüşə sınması sığortası (25 faiz), sağlamlıq sığortası (47 faiz), fərdi qəza və xəstəlik sığortası (100 faiz) üzrə verilmiş ödənişlər nətcəsində qeydə alınıb.
Ümumilikdə sığorta ödənişlərinin sığorta haqlarına nisbəti 33 faiz təşkil edib.
Həsənovun sözlərinə görə, şirkət bu il nizamnamə kapitalını 4 milyon manatadək artırmağı planlaşdırır.
2010-cu ildə "Basak-İnam Sığorta Şirkəti"nin məcmu kapitalı 2,163 milyon manatdan 3,645 milyon manatadək artıb. Belə artım şirkətin nizamnamə kapitalının 1,6 dəfə artırılaraq 3,25 milyon manata çatdırılması nəticəsində təmin edilib.
Azərbaycanın sığorta şirkəti "Başak-İnam Sığorta Şirkəti" ölkənin sığorta bazarında 1996-cı ildən fəaliyyət göstərir. Şirkətin səhmlərinin 49 faizi dünyanın 15 ölkəsində fəaliyyət göstərən Fransa və Avropanın ən iri şirkəti Groupama - Groupama Sigorta A.Ş. şirkətinə məxsusdur. Qalan 51 faiz tərkibinə "TuranBank", "AzərTürkBank", "Aqrarkredit" və fiziki şəxslərin daxil olduğu Azərbaycan səhmdarlarına məxsusdur.
Mayın 20-nə olan rəsmi məzənnə 0,7902 AZN/USD təşkil edir.
