Azərbaycan, Bakı, 21 may /Trend, müxbir N.İsmayılova/
Azərbaycanda girov əmlakının satışı üzrə www.girov.az portalının təqdimatı olub. Bu portal vasitəsilə Azərbaycanın kredit təşkilatları girov əmlakının satışı haqqında elan vermək imkanı əldə edəcəklər. Portal Azərbaycanın Risk Peşəkarları Assosiasiyası (ARPA) tərəfindən yaradılıb.
"Bu gün banklar girov əmlakının satışı problemi ilə qarşılaşırlar və buna görə də portalın yaradılmasına zərurət yaranıb. Orada onlar öz elanlarını yerləşdirə bilərlər", - ARPA rəhbəri Rüfət Mahmud deyib.
Portalın baza məlumatlarından istifadə pulsuz, elanların yerləşdirilməsi isə ödənişli olacaq. Portal 4 bölmədən ibarətdir. Orada girov əmlakının, nəqliyyat vasitələrinin, avadanlıq və biznesin satışı haqqında elanlar yerləşdirilib.
ARPA-nın yaradılmasında məqsəd ölkənin maliyyə sektorunda risklərin azaldılmasına kömək etməkdir. Assosiasiya ölkənin Mərkəzi Bankı, Risk-Menecment Peşəkarları Qlobal Assosiasiysı (GARP) və IFC ilə əməkdaşlıq edir.
ARPA 2009-cu ilin mayında yaradılıb.
