Azərbaycan, Bakı, 23 may /Trend, müxbir İ.Xəlilova/
2011-ci ilin yanvar-aprel ayları ərzində Azərbaycana mal idxalının 54 faizi gömrük rüsümlarının və vergilərin ödənilməsindən azad edilib. Trend-in məlumatına görə, bu barədə Dövlət Gömrük Komitəsinin Maliyyə-tarif və valyuta nəzarəti Baş İdarəsinin rəisi Mirqasım Vahabov parlamentin İqtisadi siyasət və Sosial siyasət komitələrinin iclasında 2011-ci il dövlət büdcəsinin dəyişikliklər layihəsinin müzakirəsi zamanı deyib.
"Bu il ərzində Azərbaycan hökuməti bəzi malların idxalının ƏDV və gömrük rüsumlarının ödənilməsindən azad edilməsi haqqında daha dörd qərar qəbul edib, - Vahabov bildirib. - Bu o faktı təsdiq edir ki, gömrük yığımları üçün vergiqoyma bazası azalır. Azərbaycanın qeyr-neft sektorunun inkişafı ilə əsas məqsəd idxaldan asılılığın azalması olmalıdır".
Bununla yanaşı, 2011-ci il dövlət büdcəsi proqnozlarına düzəlişlər çərçivəsində DGK üçün gömrük vergilərinin və rüsumlarının yığım planının 1 140 milyon manatadək artırılması təklif edilir. Bu, cari il üçün təsdiq edilən proqnozdan 1,8 faiz və ya 2010-cu ilin faktiki göstəricisindən 3,5 faiz çoxdur. Gömrük orqanları ƏDV yığımından dövlət büdcəsinə müvafiq olaraq 1,5 faiz və 2,3 faizlik artımla 830 milyon manat daxilolmanı, 223 milyon manat (müvafiq olaraq 3,7 faiz və 2,2 faiz) gömrük rüsumunu təmin edəcəklər.
"Gömrük orqanlarının 1,3 milyard manatlıq yığım proqnozunun kəsirlə yerinə yetirildiyi 2009-cu ildə qarşılaşdıqları vəziyyətdən yayınması üçün məqsədəuyğun olardı ki, hökumət qurumları proqnozları müəyyənləşdirərkən fəaliyyətlərini əlaqələndirsinlər, belə ki, Gömrük Komitəsi üçün planlı tapşırığı reallıqları nəzərə almaqla balanslaşdırmaq lazımdır", - Vahabov vurğulayıb.
