Azərbaycan, Bakı, 26 may /Trend, müxbir T.Cəfərov/
Azərbaycan və İranın dəmir yol administrasiyaları arasında dəmir yolu sahəsində əməkdaşlıq yüksək səviyyədədir. Bunu İran Dəmir Yolları İdarəsinin Beynəlxalq əlaqələr şöbəsinin rəhbəri Abbas Nəzəri Trend-ə müsahibəsində bildirib.
Nəzərinin sözlərinə görə, Astara (İran) - Astara (Azərbaycan) dəmiryolu layihəsinin birləşdirilməsi iki ölkənin dəmiryol sahəsində əməkdaşlığına təkan verəcək və regionda yükdaşımalar üçün böyük potensial yaradacaq.
O deyib ki, Azərbaycan və İran dəmir yolu idarələri "Şimal-Cənub" dəmiryol dəhlizinin çəkilməsi işlərinin sürətləndirilməsi, Astara (İran) - Astara (Azərbaycan) dəmiryolunun tikinti işlərinin sürətlədirilməsi, İran və Azərbaycan dəmir yolu idarələri arasında 2011-ci ildə sərhəd müqavilələrinin imzalanması, Azərbaycanla sərnişin və yük vaqonları, dəmir yolu nişanları, elektrik qatarları və lokomotivlərin istehsalı sahəsində əməkdaşlıqlarını inkişaf etdirməkdə maraqlıdır.
Nəzərinin sözlərinə görə, Qəzvin - Rəşt - Astara (İran) - Astara (Azərbaycan) dəmir yolu "Şimal-Cənub" nəqliyyat dəhlizinin ayrılmaz tərkib hissəsidir.
Nəzəri Rəşt - Astara (İran) - Astara (Azərbaycan) dəmir yolunun tikintisinə İran, Azərbaycan və Rusiyanın birgə müəssisəsinin Moskvada qeydiyyatından sonra başlanacağını bildirib.
Layihə çərçivəsində Azərbaycan ərazisində işlərin həcmi Astara (Azərbaycan) stansiyasına qədər 8,5 kilometrə yaxın dəmir yolu xəttinin, təkərlərin dəyişdirilməsi üçün sistem stansiyalarının, sərhəd və gömrük infrastrukturunun tikintisini nəzərdə tutur. Sərhəd dəmir yolu körpüsünü də tikmək lazımdır, lakin bu layihə İranla paritet əsasda həyata keçiriləcək.
"Hazırda Rəşt-Astara (İran) - Astara (Azərbaycan) dəmir yolunun tikilməsi, istifadəsi və yüklərin daşınması ilə bağlı təsis olunması haqda razılıq əldə olunmuş birgə müəssisənin nizamnaməsi və biznes-planı üç ölkənin ekspertləri tərəfindən tənzimlənir. Nizamnamə və biznes-plan tənzimləndikdən sonra birgə müəssisə Moskvada qeydiyyata alınacaq. Bundan sonra həmin birgə müəssisə sərmayə təmin edərək Rəşt - Astara (İran) - Astara (Azərbaycan) dəmir yolunun tikintisinə başlaycaq", - Nəzəri deyib.
Azərbaycan, Rusiya və İranın dəmir yol idarələrinin rəhbərləri fevralın 7-si Tehranda "Şimal-Cənub" dəmir yol nəqliyyat dəhlizi layihəsi çərçivəsində birgə müəssisənin yaradılması barədə saziş imzalayıblar. Birgə müəssisənin baş ofisi Moskvada yerləşəcək. Öz növbəsində Bakı və Tehranda onun filialları olacaq. Şirkət dörd ay ərzində Rəşt-Astara (İran)-Astara (Azərbaycan) dəmiryolu layihəsinin tikintisinin biznes-planını hazırlayacaq.
Dəmiryolunun tikintisinə 400 milyon dollar məbləğində investisiya nəzərdə tutulub. İnvestisiyaları iştirakçı ölkələrin bankları, eləcə də digər regional maliyyə institutları sayəsində cəlb etmək planlaşdırılır. Bunun Rusiya bankları olacağı daha çox güman ediləndir, - Nəzəri qeyd edib.
Bu dəhlizlə yüklərin daşınmasının həcminin birinci mərhələdə ildə 6 milyon ton, gələcəkdə isə ildə 15-20 milyon tona qədər olacağı proqnozlaşdırılır.