Azərbaycan, Bakı, 22 iyun /Trend, müxbir N.İsmayılova/
"Moody`s" beynəlxalq reytinq agentliyi hesab edir ki, Azərbaycan Beynəlxalq Bankının (ABB) özəlləşdirilməsi bankın kredit reytinqinə müsbət təsir edəcək. Bu barədə çərşənbə günü agentliyin məlumatında deyilir.
Məlumata görə, bu, muxtar gücün artırılmasına, şəffaflığın çoxalmasına, korporativ idarəetmənin yaxşılaşmasına və bankın kapitallaşmasının möhkəmlənməsinə gətirib çıxaracaq.
Özəlləşdirmə habelə bank sektorunun rəqabət dinamikasının yaxşılaşmasına və bankların ümumi maliyyə göstəricilərinin möhkəmlənməsinə yardım edəcək.
ABB-nin məsləhətçiləri özəlləşdirmənin şərtləri üzrə tövsiyələr hazırlayırlar, hüquqi və texniki dəstək gösrtərirlər, hökumətin payını qiymətləndirir və Beynəlxalq Banka strateji sərmayədarların cəlb edilməsində kömək edirlər.
Özəlləşdirmə prosesi və ABB-nin nizamlanamə kapitalında dövlətin payının azaldılması (dövlətsizləşdirmə) prosesi üzrə xidmətlərin göstərilməsi ilə bağlı PriceWaterhouseCoopers Audit Azerbaycan, Salans UK Limited, Rothschild & CIE konsorsiumunun Azərbaycan filialı məsləhətçi seçilib.
"Aydındır ki, bu, uzunmüddətli proses olacaq və biz bu il ABB-nin özəlləşdirilməsinin başa çatacağını gözləmirik", - məlumatda deyilir.
Azərbaycanın ən iri bankı olmaqla ABB bank sektorunda hakim mövqe tutur. 2010-cu ilin sonuna olan məlumata görə, onun payına bank sisteminin aktivlərinin ümumi həcminin 42 faizi, kreditlərin 43 faizi və əmanətlərin 36 faizi, eləcə də əhalinin əmanətlərinin 24 faizi düşür.
"Bankın özəlləşdirilməsi həm də onun hakim statusunu dəstəkləyir, çünki ABB kapitalın artırılmasından fayda əldə edəcək ki, bu da iri şirkətlərin, eləcə də müştərilərin geniş dairəsinin geniş distribüter şəbəkəsi vasitəsilə maliyyələşdirilməsinə imkan verəcək", - məlumatda deyilir.
"Moody`s"in gözləntilərinə görə, bank kapitalının səhm emissiyası nəzərəçarpacaq dərəcədə artacaq.
ABB yarıdövlət bankıdır və onun əsas səhmdarı hazırda Azərbaycan hökumətidir. O, səhmlərin 50,2 faizinə sahibdir. Qalan 49,8 faiz pay isə fiziki və hüquqi şəxslər arasında bölüşdürülüb.
