Azərbaycan, Bakı, 7 iyul /Trend, müxbir A.Axundov/
"İpək Yolu" sığorta şirkəti Əfqanıstanda Azərbaycanın "Silk Way" aviaşirkətinin təyyarəsinin qəzaya uğraması ilə əlaqədar hadisənin araşdırılması üzrə xüsusi komissiyanın işinin başa çatmasından və hava gəmisinin düşmə səbəbi müəyyən olunduqdan sonra sığorta ödənişi məbləğini müəyyən edəcək. Bu barədə cümə axşamı Trend-ə sığorta şirkətinin idarə heyətinin sədri Niyazi İmanov bildirib.
"Silk Way" aviaşirkətinin təyyarəsi "İpək Yolu" sığorta şirkətində sığorta olunub.
Əfqanıstanın Hava Məkanının İdarə Edilməsi Xidmətinin məlumatına görə, iyulun 6-da saat 00:10-da (Bakı vaxtı ilə saat 02:10) Baqram aeroportu yaxınlığında yerə enməli olan "Silk Way"in yük təyyarəsilə ilə əlaqə kəsilir və radarlardan itir. Eyni zamanda, təyyarənin uçuşunu idarə edən dispetçer Kabil aeroportundan təxminən 25 kilometr məsafədə 4 kilometr yüksəlikdə alov gördüyü barədə məlumat verib.
Əlaqə kəsilənədək hava gəmisindən nasazlıq və ya qəza vəziyyəti ilə bağlı hər hansı bir məlumat daxil olmadığından onun havada naməlum obyektlə toqquşduğu ehtimal edilir.
Bakı-Baqram marşrutu ilə hərəkət edən və saat 21:26-da (yerli vaxtla) havaya qalxan təyyarənin göyərtəsində Heydər Əliyev beynəlxalq hava limanından qəbul etdiyi 18 ton yük olub.
Yük tutumu 40 ton olan təyyarə 2005-ci ildə tikilib və 2011-ci ilin fevralında tam texniki baxışdan keçib. 2011-ci ilin iyununda o, növbəti texniki baxışdan keçib.