Azərbaycan, Bakı, 6 sentyabr /Trend, müxbir N.İsmayılova/
Asiya İnkişaf Bankı (AİB) Azərbaycanda su təchizatı və sanitar xidmətləri sisteminin yaxşılaşdırılması üçün multitranş maliyyələşdirmədən (MFF) ikinci və üçüncü tranşların ayrılması məsələsinin Direktorlar Şurasında baxılacağı tarixi müəyyənləşdirib. Trend-in məlumatına görə, bu barədə çərşənbə axşamı AİB-in rəsmi saytında məlumat verilib.
"AİB-in Direktorlar Şurası MFF çərçivəsində 300 milyon dollar məbləğində ikinci tranşın təsdiqlənməsi məsələsinə 2011-ci il dekabrın 2-də, 175 milyon dollarlıq üçüncü tranşa isə 2012 dekabrın 31-də baxmağı planlaşdırır", - bankın məlumatında deyilir.
Bu gün AİB su təchizatı və sanitar xidmətlər sisteminin yaxşılaşdırılması üzrə iki layihəni maliyyələşdirir. 30 milyon dollar məbləğində birinci kredit 2004-cü ildə Göycay və Naxçıvanda su təchizatı sisteminin bərpasına ayrılıb. Onun həyata keçirilmə müddəti 30 iyun 2011-ci ildə başa çatır.
Beş il əvvəl təsdiqlənmiş layihənin bahalaşması və həmin rayonlarda işləri tam əhatə etməsi ilə əlaqədar MFF vəsaitləri hesabına 75 milyon dollar (birinci tranş), Azərbaycan hökuməti isə 25 milyon dollar ayırıb.
İkinci tranş bu layihənin əhatə dairəsinin genişləndirilməsinə və dörd şəhəri - Ağdaş, Ağcabədi, Beyləqan və Balakəni əhatə etmək üçün nəzərdə tutulub.
MFF 2009-cu ilin sentyabrında bankın Direktorlar Şurasında 600 milyon dollar həcmi ilə bəyənilib. Multitranş maliyyələşdirmə su təchizatı və kanalizasiya sahəsində islahatlar proqramı və aydın strategiya ilə dəstəklənən investisiyaları nəzərə alaraq AİB ilə ölkə hökuməti arasında səkkizillik əməkdaşlıq üçün əsas olacaq.
"Azərsu" ASC-nin su layihəsi üzrə məsləhətçisi "AICO Consulting Ltd/European Consultans Organization" konsorsiumudur.