Azərbaycan, Bakı, 29 oktyabr /Trend, müxbir A.Axundov/
Yanvar-sentyabrda Azərbaycan 77,37 milyon dollar məbləğində kimyəvi məhsullar ixrac edib ki, bu da ümumi ixracın 0,39 faizini təşkil edir və ötən ilin müvafiq dövründəki göstəricidən 2,29 dəfə çoxdur. Trend-in məlumatına görə, bu barədə Dövlət Gömrük Komitəsinin hesabatında deyilir.
İlk doqquz ay ərzində ixracın böyük hissəsi (86,73 faiz) xam neftin payına düşüb. Yanvar-sentyabrda 17,125 milyard dollar həcmində xam neft ixrac olunub ki, bu da ötən ilin analoji dövründəki göstəricini 26,21 faiz ötür.
Hesabat dövründə 1,1 milyard dollar (il ərzində artım 14,94 faiz) məbləğində neft məhsulları ixrac olunub ki, bu da ölkənin ümumi ixracının 5,6 faizini təşkil edib.
İlin ilk doqquz ayı ərzində 156,15 milyon dollar məbləğində qara metal və ondan hazırlanan məmulatlar (artım 81,38 faiz, ümumi ixracda payı 0,79 faiz), 4,5 milyon dollar məbləğində təmizlənmiş pambıq (artım 95,63 faiz, ümumi ixracda payı 0,02 faiz ), 6,96 milyon dollar məbləğində tütün və tütün məmulatları (60,33 faiz artım, ümumi ixracda payı 0,04 faiz), 3,87 milyon dollarlıq aluminum və ondan hazırlanan məmulatlar (88,37 faiz artım, ümumi ixracda payı 0,02 faiz), 118,8 milyon dollarlıq meyvə-tərəvəz (artım 72,5 faiz, ümumi ixracda payı 0,6 faiz); 9,86 milyon dollarlıq alkoqollu və alkoqolsuz içkilər (azalma 8,79 faiz, ümumi ixracda payı - 0,05 faiz); 141,08 milyon dollarlıq bitki və heyvan mənşəli yağlar (artım 0,59 faiz, ümumi ixracda payı - 0,71 faiz) ixrac olunub.
Doqquz ay ərzində ixrac əməliyyatları 19,75 milyard dollar təşkil edib ki, bu da 2010-cu ilin analoji dövrü ilə müqayisədə 26,03 faiz çoxdur.
Yanvar-sentyabrda Azərbaycanın idxalı 6,87 milyard dollar təşkil edib ki, bu da 2010-cu ilin analoji dövrü ilə müqayisədə 51,12 faiz çoxdur.
Xarici ticarət əməliyyatlarında 12,88 milyard dollar həcmində müsbət saldo yaranıb.
Ölkədə mal dövriyyəsinin ümumi həcmi 26,616 milyard dollar təşkil edib. Bu, 2010-cu ilin analoji dövrü ilə müqayisədə 31,67 faiz çoxdur.
