Azərbaycan, Bakı, 29 noyabr /Trend, müxbir N.İsmayılova/
Azərbaycan hökuməti ölkədə kənd təsərrüfatının inkişafı və kreditləşdirilməsi uyğunlaşdırılmış proqramının II mərhələsinin həyata keçirilməsi müddətinin dörd ay uzadılması məqsədilə Dünya Bankına (DB) sorğu göndərib. Bu barədə çərşənbə axşamı Trend-ə bankın Bakı nümayəndəliyindən məlumat veriblər.
"Uyğunlaşdırılmış proqramın II mərhələsinin reallaşdırılma müddəti 2012-ci ilin fevralında başa çatmalı idi, lakin hökumət tərəfindən banka onun reallaşdırılması müddətinin 2012-ci il iyunun sonuna kini uzadılması barədə sorğu daxil olub", - DB-dən deyiblər.
Bankdan deyildiyi kimi, layihənin uzadılma zərurəti ikinci mərhələ çərçivəsində üçüncü layihənin hazırlanması üzrə işlərin aparılması barədə qərarın qəbul edilməsidir.
"Həmin işlər SDR-in məzənnəsinin dollara nisbətdə artması nəticəsində yaranan artıq vəsaitin hesabına həyata keçirilir, - bankın nümayəndəliyindən bildirilib. - Hazırda artıq üçüncü layihənin hazırlanması üzrə işlər aparılır, lakin hələ də həll olunmamış bir sıra məsələlər qalmaqdadır".
2006-cı ilin payızında Azərbaycanla DB arasında kənd təsərrüfatının inkişafı və kreditləşməsi proqramının ikinci mərhələsi üzrə kredit sazişi imzalanıb. Bu layihənin həyata keçirilməsi fermerlərin gəlirlərinin və kənd təsərrüfatı müəssisələrinin səmərəliliyinin artmasına xidmət edir. Layihə 2007-ci ildən həyata keçirilməyə başlayıb, 4 il üçün nəzərdə tutulub.
Layihənin ümumi dəyəri 59,5 milyon dollar təşkil edir, Dünya Bankının kreditinin payına 30 milyon dollar düşür. Beynəlxalq İnkişaf Assosiasiyasının (BİA) vəsaitlərindən 20,5 milyon dollar, 8 milyon dollar BİA şərtlərinin sərtləşdirilməsi üçün ayrılıb. Bu da 35 il müddətinə ödənişi 10 il güzəştli olmaqla, libor-2 faiz dərəcəsi ilə hesablanıb.
Bankın Azərbaycandakı cari portfeli ümumi dəyəri 2,3 milyard dollar olan 20 layihədən ibarətdir. Azərbaycan 1992-ci ildən DB ilə əməkdaşlıq edir və əməkdaşlıq çərçivəsində bank hazırda 43 layihənin maliyyələşdirilməsinə 2,9 milyard dollar ayırıb, bu isə Türkiyə və Qazaxıstandan sonra ölkəni portfelin həcminə görə üçüncü yerə qoyur.
