Azərbaycan, Bakı, 8 dekabr /Trend, müxbir A.Axundov/
İsveçrə Azərbaycana Ümumdünya Ticarət Təşkilatına (ÜTT) daxil olma prosesi çərçivəsində saatların idxalına görə gömrük rüsumlarını azaltmağı təklif edir. Trend-in məlumatına görə, bu barədə cümə axşamı Bakıda keçirilən Azərbaycan-İsveçrə ticari-iqtisadi əməkdaşlıq üzrə birgə komissiyanın beşinci iclasının yekunları üzrə imzalanmış protokolda deyilir.
İsveçrənin Saat Sənayesi Assosiasiyasının məlumatına görə, 2011-ci ilin yanvar-oktyabrında İsveçrədən qol saatlarının ixracı ötən ilin analoji dövrü ilə müqayisədə 19 faizə yaxın təşkil edib. Təkcə oktyabr ayı üzrə saat ixracı ötən ilin analoji dövrü ilə müqayisədə 18 faiz və ya 1,9 milyard İsveçrə frankı təşkil edib.
Bundan əlavə, İsveçrə saat sənayesi üçün Azərbaycana nümunələrin ixracını asanlaşdırmaq məqsədilə İstanbul konvensiyasına qoşulmaq imkanına baxmağı təklif edir.
"İsveçrə Azərbaycanın ÜTT-yə üzvlüyünü dəstəkləyir və bunun Azərbaycan iqtisadiyyatının dünya iqtisadiyyatına inteqrasiyasını gücləndirəcəyini qeyd edir", - protokolda deyilir.
Habelə, Azərbaycanın İxracın və İnvestisiyaların Təşviqi Fondu (AZPROMO) və OSEC Business Network Switzerland təşkilatı arasında əməkdaşlığın yaradılması və inkişafı haqqında razılaşma da əldə olunub.
Azərbaycan tərəfi isveçrəli sərmayədarların ölkənin turizm sektoruna cəlb edilməsində maraqlı olduğunu da ifadə edib.