Azərbaycan, Bakı, 21 dekabr /Trend, müxbir E.İsmayılov/
TRACECA (Avropa-Qafqaz-Asiya) nəqliyyat sahəsində beynəlxalq əməkdaşlıq proqramının hökumətlərarası komissiyasının yubiley (sayca 10-cu) iclası Düşənbədə keçiriləcək. Bu barədə çərşənbə günü Trend-ə TRACECA-nın Azərbaycandan olan milli katibi Akif Mustafayev məlumat verib.
Hökumətlərarası komissiyanın sonuncu iclası bu ilin noyabrında Buxarestdə keçirilib.
Mustafayevin sözlərinə görə, komissiyanın növbəti iclası 2013-cü ilin mayında baş tutacaq.
"İclas zamanı rəhbərlik Rumıniyadan Tacikistana keçəcək", - Mustafayev bildirib.
Onun sözlərinə görə, hökumətlərarası komissiyanın növbəti iclasının keçirilməsinin bir az yubadılması onunla bağlıdır ki, Tacikistanda qış dövründə hava şəraiti TRACECA-ya daxil olan ölkələrin nümayəndə heyətlərinin gəlişini çətinləşdirə bilər. Buna görə də iclasın 2013-cü ilin mayında keçirilməsi qərara alınıb.
"İclasın dəqiq keçirilmə vaxtı hələlik müəyyən edilməyib, lakin 2013-cü ilin mayında təşkil ediləcək", - Mustafayev deyib.
TRACECA Aİ və Şərqi Avropa, Cənubi Qafqaz və Mərkəzi Asiyada onun tərədaş ölkələri arasında nəqliyyat sahəsində beynəlxalq əməkdaşlıq proqramıdır. Təşkilatın Bakıda daimi katibliyi var.
Hazırda TRACECA-nın iştirakçı dövlətləri Azərbaycan, Bolqarıstan, Gürcüstan, Qazaxıstan, Qırğızıstan, Ermənistan, Moldova, Rumıniya, Tacikistan, Türkmənistan, Türkiyə, Ukrayna və İrandır.