Azərbaycan, Bakı, 27 dekabr /Trend, müxbir E.İsmayılov/
Azərbaycanın Nəqliyyat Nazirliyi Asiya İnkişaf Bankına (AİB) müraciət edərək dördzolaqlı Masallı-Astara sürət magistralının tikintisinin davam etdirilməsi çərçivəsində podratçının müəyyən edilməsi üzrə yeni tenderin elan edilməsini təklif edib. Bu barədə çərşənbə axşamı Trend-ə nazirlikdəki mənbə deyib.
"Yanvarın ikinci yarısında tender proseduru ilə bağlı məsələnin tam həlli planlaşdırılır: ya indiki tender ləğv edilib yenisi elan edilməli, ya da tender iştirakçıları təqdim etdikləri təklifləri dəyişdirməlidirlər", - nazirlikdən bildiriblər.
Podratçılar В və С hissələrinin tikintisi üçün müəyyən edilib və AİB artıq tender proseduru üzrə hesabatı təqdim edib.
"Tender prosedurunun artıq bir ildir davam etməsi səbəbindən şirkətlərin təqdim etdikləri təkliflər artıq köhnəlib və yenidən işlənmə tələb edir. Bundan əlavə, layihə işlərinin torpağın alınması templərinə yaxınlaşdırılması planlaşdırılır, daha doğrusu, yol hissələrinin parametrlərinin dəyişdirilməsi mümkündür", - nazirlikdən deyiblər.
Yeni dördzolaqlı yolun tikintisi çərçivəsində torpağın alınması məsələsinin həllinə toxunan mənbə, məsələnin açıq qaldığını qeyd edib. Torpağın alınması prosesi torpaqların bəzi pay sahiblərinin ölkə hüdudlarından kənarda olması səbəbindən yubanır.
İstənilən halda layihənin dəyişdirilməsi əlavə vəsaitlərin cəlb olunmasını tələb etmir, çünki AİB-in bu günlərdə 200 milyon dollar məbləğində təsdiqlədiyi kreditə nəzərdə tutulmamış xərclər artıq daxil edilib.
Bu vəsaitlər Azərbaycandakı yol layihələri üçün (Road Network Development Program) multitranş paketi (Multitranche Financing Facility - MFF) çərçivəsində ayrılıb. Kredit 2007-ci ilin avqustunda 500 milyon dollar həcmində təsdiqlənib. MFF-dən artıq 455,4 milyon dollar vəsait ayrılıb.
200 milyon dollar məbləğində birinci tranş Masallı-Astara avtomobil yolunun tikintisinə, ikincisi (55,4 milyon dollar) - Gəncə dairəvi yolunun yenidən qurulmasına, üçüncü isə (200 milyon dollar) Masallı-Astara yolunun tikintisinin davam etdirilməsinə ayrılıb.
Yolun birinci hissəsinin (А) tikintisi üçün "Azərinşaatservis" şirkəti seçilib.
