Azərbaycan, Bakı, 30 yanvar /Trend, müxbir A.Axundov/
Ötən ilin dekabrında Bakının avtomobil bazarında təklif 2,6 faiz artıb. Bu barədə bazar ertəsi Trend-ə "Əmlak Bazarı İştirakçıları" İctimai Birliyindən (İB) məlumat veriblər.
Bazarda təklifin tələb üzərində artım tendensiyasına baxmayaraq, əvvəlki aylarla müqayisədə bazarda tələbin artması müşahidə olunub.
Bazarda tələbin və dinamikanın artması dekabrda avtomobillərin bahalaşmasına təsir edib. Ay ərzində qiymətlər 1,3 faiz artıb, bazarda avtomobilin orta hesabla qiyməti 16 150 dollar təşkil edib.
"Bazarda dinamikanın artması 1 faiz azalaraq 44,6 günə çatan əmlakın ekspozisiya müddətinin azalmasına səbəb olub", - təşkilatın ekspertləri hesab edirlər.
Ötən ilin dekabr ayı ərzində təşkilat təkrar avtomobil bazarında monitorinq aparıb. Bu zaman 13 500-dən artıq avtomobil araşdırma predmeti olub ki, onların yalnız 28,2 faizi dekabrda bazara çıxarılıb. Yerdə qalan 68,7 faiz əvvəlki aylardan qalıb. Köhnə avtomobillərin bazara kütləvi axını son beş ay ərzində nəzərəçarpacaq dərəcədə azalıb.
Təkrar bazarda liderlik mövqeyini uzun müddət qoruyub saxlayan "Mersedes" markalı avtomobillərə təklifin həcmi dekabrda noyabra nisbətən 1,4 faiz artıb. Bazarda bu markadan olan avtomobillərin payı 31,8 faiz təşkil edir.
Bazarın portfelində 9 markadan olan avtomobillərin payı 83,7 faiz təşkil edir. Yerdə qalan 16,3 faiz 20-dən yuxarı avtomobil şirkətinin 80 markadan çox avtomobillərinin payına düşür.
Ekspertlərin fikrincə, təkliflər portfelində köhnə avtomobillərin payının hələ də böyük olmasına baxmayaraq, yaxın gələcəkdə bazarda üstünlük 2003-cü ildən sonra istehsal olunan avtomobillərə veriləcək.
