Azərbaycan, Bakı, 13 fevral /Trend, müxbir A.Axundov/
Azərbaycanın "Atəşgah" sığorta şirkəti 2012-ci ildə könüllü tibbi sığortanı inkişaf etdirmək niyyətindədir. Bu barədə bazar ertəsi Trend-ə şirkətdən bildiriblər.
"2012-ci ildə icbari sığortanın növləri üzrə xidmətlər inkişaf etdiriləcək. Bununla yanaşı, könüllü tibbi sığorta üzrə yeni məhsulların hazırlanması gözlənilir", - şirkətdən qeyd ediblər.
Hazırda şirkətin yığımlarının 20 faizindən çoxu könüllü tibbi sığortanın payına düşür, 2011-ci ildə bu növ üzrə 3,98 milyon manat yığılıb.
Şirkət "İcbarı sığorta növləri haqqında" yeni qanunun tələblərinə uyğun olaraq, ölkədə yaradılan İcbarı Sığorta Bürosunun iştirakçısıdır.
Qanun icbari sığortanın dörd növünü - daşınmaz əmlakın, avtonəqliyyat vasitələri sahiblərinin məsuliyyətinin, sərnişinlərin və daşınmaz əmlakın istismarı zamanı vətəndaş məsuliyyətinin sığortalanmasını tənzimləyir. Sığorta şirkətləri qanunun tətbiqinə 2011-ci il dekabrın 16-dan başlayıblar.
"Atəşgah" sərnişinlərin sığortasından başqa, bütün bu növlər üzrə işləyir.
"Yeni qanunun qəbul edilməsinə qədər 2011-ci ildə icbari sığorta növləri üzrə yığımların ümumi həcmi təxminən 0,8 milyon manat təşkil edib", - şirkətdən qeyd ediblər.
Azərbaycan Maliyyə Nazirliyi yanında Dövlət Sığorta Nəzarəti Xidmətinin məlumatına əsasən, 2011-ci ildə şirkət 18,547 milyon manatla sığorta mükafatları üzrə bazarın dördüncüsü olub.
Şirkətin məlumatına görə, "Atəşgah"ın müştəri bazasının təxminən 60 faizi korporativ seqmentin payına düşür.
"Atəşgah" universal sığortaçıdır, 2011-ci ildə olduğu kimi, şirkət cari ildə də hər iki seqment üzrə xidmətlər göstərəcək. 2012-ci ildə iki seqment arasında nisbət bərabər olacaq", - şirkətdən deyiblər.
"Atəşgah" sığorta şirkəti 1996-cı ilin sonunda təsis edilib və "Atəşgah" Sığorta Qrupuna daxildir. Şirkət müştərilərinə 20-dən çox sığorta növü üzrə xidmət göstərir.
Fevralın 13-nə olan rəsmi məzənnə 0,7863 AZN/USD təşkil edir