Azərbaycan, Bakı, 23 fevral /Trend, müxbir A.Axundov/
Azərbaycanda "Sığortanın icbari növləri haqqında" yeni qanun çərçivəsində yaradılan İcbari Sığorta Bürosu ölkədəki hər üç mobil rabitə operatoru ilə yeni xidmətin işə salınması barədə danışıqlar aparır. Bu barədə Trend-ə cümə axşamı bürodan məlumat verilib.
"Gələcəkdə sığortaçı icbari sığorta müqaviləsi çərçivəsində əməliyyatlar, eləcə də bu sənəddə əks olunan məlumatlar barədə xəbərdarlığı mobil rabitə vasitəsilə əldə edəcək", - bürodan deyiblər.
Büro xidməti yaxın günlərdə işə salmağı planlaşdırır. Xidmət çərçivəsində abonentə sığorta şəhadətnaməsinin seriyası və nömrəsi, şəhadətnamənin qüvvəyə minməsi və onun müddətinin başa çatması, sığorta şirkətinin adı və əlaqələri barədə məlumatlar SMS ismarıc vasitəsilə göndəriləcək.
"Beləliklə, abonentlər dövlət qeydiyyat nişanını göndərməklə sığorta şəhadətnaməsinin həqiqiliyi, onun fəaliyyət müddəti, sığorta şirkəti və digərləri haqqında məlumatları əldə edə biləcəklər", - bürodan bildiriblər.
