Azərbaycan, Bakı, 7 mart /Trend, müxbir A.Axundov/
Azərbaycan Mərkəzi Bankı (AMB) tərəfindən hazırlanan "2012-2016-cı illərdə elektron ödənişlərin genişləndirilməsi üzrə Dövlət Proqramı" layihəsi ölkədə beş il ərzində nağdsız dövriyyəni Baltikyanı və Şərqi Avropa ölkələrindəki səviyyəyə çatdırmağı nəzərdə tutur. Trend-in məlumatına görə, bu barədə çərşənbə günü Vergilər Nazirliyinin "Vergilər" qəzetindəki məlumatda deyilir.
"Əgər bu gün Baltikyanı ölkələrdə elektron ödənişlər ümumi dövriyyənin təxminən 45 faizini təşkil edirsə, Azərbaycanda bu göstərici 3,5 faizdir. Beş il ərzində ölkədə elektron dövriyyəni 10 dəfədən çox artırmaq planlaşdırılır", - məqalədə deyilir.
Vergilər Nazirliyi proqram çərçivəsində vergilərin, rüsumların və digər büdcə ödənişlərinin milli ödəniş sistemləri vasitəsilə həyata keçirilməsini təmin edəcək. Bunun üçün artıq Komis sistemində dövlət ödənişləri portalı yaradılacaq.
"Bu məqsədlər üçün sistemə 20 min vergiödəyici haqqında məlumat daxil edilib. Yaxın vaxtlarda artıq 90 növ tədiyyə üzrə ödənişlərin Komis resurslarından istifadə etməklə qəbul edilməsinə başlanacaq", - məqalədə deyilir.
2011-ci ilin sonlarına olan məlumata görə, AZIPS (iri ödənişlər üzrə milli banklararası sistem) sistemi üzrə 99 milyard manat, XONKS (xırda ödənişlərin klirinq sistemi) - 8,6 milyard manat, Komis sistemi vasitəsilə 20 milyon manat ödəniş həyata keçirilib.
