Azərbaycan, Bakı, 8 may /Trend, müxbir A.Axundov/
Azərbaycanın iri holdinqlərindən biri olan "AtaHoldinq" ASC öz adını dəyişə bilər.
Bu məsələ iyunun 29-da keçirilməsi planlaşdırılan holdinqin səhmdarlarının ümumi yığıncağında müzakirə olunacaq. Bu barədə holdinqin çərşənbə axşamı yaydığı məlumatda deyilir.
Bundan başqa, ümumi yığıncaqda "AtaHoldinq" ASC-nin İdarə Heyəti və Müşahidə Şurasının 2011-ci maliyyə ilində fəaliyyətinin yekunları üzrə hesabatları dinləniləcək, MŞ-nin bəzi üzvləri yeni müddətə seçiləcək.
Habelə yığıncaqda holdinqin nizamnaməsinin yeni redaksiyasının təsdiqlənəcəyi və bir sıra başqa məsələlərə baxılacağı gözlənilir.
Rəsmi mətbuatda yerləşdirilən digər məlumata görə, iyunun 21-də "AtaHoldinq"ə daxil olan "AtaLizinq" ASC şirkətinin səhmdarlarının ümumi yığıncağının keçiriləcəyi gözlənilir.
İclasda şirkətin idarə heyətinin 2011-ci maliyyə ilində fəaliyyətinin yekunları üzrə hesabatı dinləniləcək və digər məsələlərə baxılacaq.