Azərbaycan, Bakı, 29 iyun /Trend, müxbir H.Vəliyev/
Pensiya müavinətlərinin verilməsi üzrə müvvəkil banklar onların paylanması prosesində gecikmələrə yol verməməlidirlər. Trend-in məlumatına görə, bu barədə cümə günü jurnalistlərə Azərbaycan Dövlət Sosial Müdafiə Fondunun (DSMF) sədri Səlim Müslümov bildirib.
"Biz ay ərzində pensiyaların maliyyəşdirilməsi ilə bağlı məsələləri həll etməyə çalışırıq. Problemlər yalnız banklar vasitəsilə pul vəsaitlərinin vaxtında köçürülməməsi ilə əlaqədar ola bilər. DSMF tərəfindən bank xidmətlərinin ödənişi və pensiyaların maliyyələşdirilməsi sahəsində problem yoxdur", - Müslümov deyib.
Onun sözlərinə görə, pensiya müavinətlərinin əsas hissəsinin maliyyələşdirilməsi dövlət sosial sığorta üzrə yığılan ödənişlər hesabına həyata keçirilir.
"Sosial ödənişlər üzrə köçürülən vəsaitlər pensiya müavinətlərinin ödənilməsi məqsədilə dərhal banklara köçürülür. Məsələn, dünən DSMF tərəfindən regionlarda pensiyaların verilməsi üçün 30 milyon manatdan çox vəsait köçürülüb", - o vurğulayıb.
Pensiyaların verilməsi üçün hər ay 200 milyon manat tələb olunur.
Müslümovun sözlərinə görə, DSMF hazırda müxtəlif ölkələrdə uğurla təcrübədən keçirilən pensiya ehtiyatının yaradılması məsələsini dəfələrlə qaldırıb. Bu məsələ 2009-2015-ci illərdə pensiya-sığorta sisteminin inkişafına dair Dövlət Proqramında öz əksini tapıb.
"Bununla yanaşı, sosial sığorta üzrə ödənişlərin indiki yığım həcmi hələlik belə ehtiyat yaratmağımıza imkan vermir. Digər tərəfdən, bu məsələ qanunvericiliklə möhkəmləndirilməlidir", - DSMF sədri vurğulayıb.
