Azərbaycan, Bakı, 31 avqust /Trend, müxbir A.Axundov/
"Başak İnam Sığorta" Azərbaycan-Türkiyə sığorta şirkəti ilin sonunadək özünün bütün məhsulları üzrə avtomatlaşdırılmış idarəetmə sistemini tətbiq etməyi planlaşdırır. Bu barədə cümə günü Trend-ə şirkətin Biznesin inkişafı departamentinin direktoru Hikmət Allahverdi məlumat verib.
Yeni idarəetmə proqramı avtomatlaşdırılmış qaydada sığorta şəhadətnamələrindən çıxarışlar hazırlamaq, mühasibat hesabatları tərtib etmək, təkrar sığorta əməliyyatlarını həyata keçirmək, sığorta hadisəsi yerində ödəniş etmək və başqa prosesləri həyata keçirmək imkanı verəcək.
"Xaricə gedənlərin sığortası, bədbəxt hadisələrdən sığortalanma, könüllü avtomobil sığortası kimi məhsullar üzrə artıq polislərin avtomatlaşdırılmış satış sistemi işləyir. İlin sonunadək bütün məhsul xətləri üzrə onlayn satış tətbiq edəcəyik", - Allahverdi deyib.
Şirkətdə avtomatlaşdırılmış sistemlər iki il əvvəl tətbiq olunmağa başlanıb.
Qeyd edək ki, "Başak-İnam Sığorta" Azərbaycanın sığorta bazarında 1996-cı ildən fəaliyyət göstərir.
