Azərbaycan, Bakı, 6 oktyabr /Trend, müxbir A.Axundov/
Azərbaycan bankları ölkədə kapital bazarının inkişafında maraqlıdırlar. Bu barədə şənbə günü Trend-ə Azərbaycan Mərkəzi Bankının (AMB) baş direktoru Rəşad Orucov deyib.
"Banklar kapital bazarının fəal iştirakçılarıdır. Bir çox hallarda bu bazarın peşəkar iştirakçıları bankların "törəmə"ləri olurlar. Korporativ əməliyyatların böyük hissəsi bankların payına düşür ki, onlar bu bazarda fəal investor kimi çıxış edirlər və onun inkişafında çox maraqlıdırlar", - Orucov bildirib.
Onun sözlərinə görə, Azərbaycanda maliyyə bazarının dərinliyi son illərdə ciddi şəkildə artıb, kapital bazarının tədavülü isə son beş il ərzində altı dəfə artıb.
"Əgər əvvəllər bankların fəaliyyəti başlıca olaraq kreditlərin verilməsi və depozitlərin qəbulundan ibarət idisə, indi banklar öz ənənəvi istiqamətlərindən uzaqlaşır və öz fəaliyyətlərini genişləndirirlər", - Orucov deyib.
Onun sözlərinə görə, universal bankçılığın həm müsbət, həm də mənfi tərəfləri var.
"Universal banklar daha iri layihələri maliyyələşdirə, daha geniş şəbəkə xidmətlərinə, böyük resusrslara malik ola bilərlər ki, bu da miqyasın iri olması effektindən istifadə etməyə və daha geniş xidmətlər təqdim etməyə imkan verir. Eyni zamanda, bu model riskli tərəflərə də malik ola bilər. Məsələn, əmanətçilərin resurslarının spekulyativ əməliyyatlara göndərilməsi zamanı. Belə risklərin mümkünlüyü bazarın inkişafının ilkin mərhələlərində yüksəkdir. Bundan başqa, universal bankların risklərinin böyüklüyü imkanlarını nəzərə alaraq, onlar rəqabətə və sistemli risklərin yaranmasına təsir edə bilərlər", - Orucov bildirib.
Azərbaycanda 43 bank fəaliyyət göstərir.
