Azərbaycan, Bakı, 14 noyabr /Trend, müxbir C.Nəsibova/
Bakıda Dubay Sənaye və Ticarət Palatasının nümayəndəliyinin açılması Birləşmiş Ərəb Əmirlikləri (BƏƏ) və Azərbaycan arasında ticarət dövriyyəsinin artmasına təkan verəcək. Trend-in məlumatına görə, bu barədə çərşənbə günü jurnalistlərə BƏƏ-nin iqtisadiyyat nazirinin müavini Mohammed Əhməd Bin Abdul Aziz Al Şihhi deyib.
Bu gün Bakıda Azərbaycan və BƏƏ arasında biznes forum keçirilib.
"Biz əminik ki, bu hadisə təkcə iki ölkə arasında ildən-ilə artan ticarət dövriyyəsinin artımına deyil, həm də ümumilikdə Azərbaycan və BƏƏ arasında iqtisadi əlaqələrin inkişafına müsbət təsir edəcək", - nazir müavini vurğulayıb.
Onun sözlərinə görə, Prezident İlham Əliyevlə görüşdə BƏƏ ilə əlaqələrin strateji əhəmiyyəti bir daha qeyd edilib.
"BƏƏ sahibkarları neft-qaz sektoru, turizm və xüsusən logistika sahəsində Azərbaycan ilə əməkdaşlıqda maraqlıdırlar. Həmçinin, biz Azərbaycanla ərzaq təhlükəsizliyinin təmin edilməsi və tikinti sektorunda əməkdaşlıq etmək niyyətindəyik", - o deyib.
