Azərbaycan, Bakı, 13 dekabr /Trend, müxbir A.Axundov/
Asiya İnkişaf Bankı (AİB) Azərbaycanda ödənişli yolların tətbiqi imkanlarının öyrənilməsi məqsədilə araşdırma aparacaq. Trend-in məlumatına görə, bu barədə cümə axşamı bankın ölkədəki nümayəndəliyinin rəhbəri Olli Noroyono mətbuat konfransında deyib.
"Bu işlər yol sektoru üçün ilk multiranş maliyyələşdirilməsinin (MFF) birinci tranşı çərçivəsində aparılır. Məsləhətçilər artıq seçilib və yaxın vaxtlarda işə başlayacaqlar", - Noroyono qeyd edib.
Onun sözlərinə görə, araşdırma gələn ilin sonuna başa çatacaq.
"Araşdırma iki istiqamətdə aparılacaq. Belə ki, ödənişli yolların tətbiqi üzrə maliyyə aspektləri və qanunvericilik məsələləri öyrəniləcək. İşlər başa çatdıqdan sonra Azərbaycan hökuməti ilə nəticələri müzakirə edəcəyik", - Noroyono bildirib.
