Azərbaycan, Bakı, 19 yanvar /Trend, müxbir İ. Xəlilova/
2012-ci ildə Azərbaycanda sənaye istehsalının (məhsul istehsalı və sənaye xarakterli xidmətlərin göstərilməsi) həcmi 33,929 milyard manat təşkil edib ki, bu da 2011-ci ilin müvafiq dövr göstəricisindən 2,3 faiz azdır. Bu barədə Dövlət Statistika Komitəsinin hesabatında bildiriblər.
Özəl sektorda sənaye məhsullarının istehsal həcmi bütün sənaye istehsalının 2,5 faiz azalaraq 81 faiz təşkil edib. Bu halda 91,8 faiz sənaye məhsullarının, 8,2 faiz isə sənaye xarakterli xidmətlərin payına düşür.
Sənayenin qeyri-neft sektorunda məhsul istehsalı 7,8 faiz, neft sektorunda isə 4,2 faiz artıb.
Hesabat dövründə hasilat sənayesində istehsalın həcmi 4,2 faiz azalaraq 25,6 milyard manat (bütün sənaye istehsalatında 75,4 faiz) təşkil edib. Hesabat dövründə neft hasilatının həcmi 5,3 faiz azalaraq 43 milyon ton, təbii qaz 5,4 faiz artaraq 17,2 milyard kubmetr təşkil edib.
2012-ci ildə emal sənayesində istehsalın həcmi il ərzində 5,4 faiz artaraq 6,42 milyard manat təşkil edib. Kompüter və digər elektron avadanlıqların istehsal həcmində 8 dəfə, rezin və plastmas məmulatların istehsalında 2,3 dəfə, elektrik avadanlıqlarında 2 dəfə, mebel istehsalında isə 2,3 dəfə, poliqrafiya fəaliyyəti sahəsində (2,2 dəfə), toxuculuq sənayesində (61 faiz), elekrtik avadanlıqları (76,9 faiz), hazır metal məmulatlar (48,6 faiz),qağız və karton (43,6 faiz) və s. istehsalında artım müşahidə edilib.
Həmçinin, qida məhsulları istehsalında 2,7 faizlik artım qeydə alınıb. Ölkədə qənd və şəkər tozu istehsalı 6,3 faiz artaraq 355,1 min ton təşkil edib. Bitki yağlarının istehsalı 64,5 faiz (63,1 min ton), marqarin istehsalı 15,2 faiz (23,1 min ton), cem və marmelad istehsalı 7,5 faiz (11,3 min ton) artıb.
Sənaye istehsalının ümumi həcmində elektrik enerjisi, qaz və buxarın istehsalı, paylanması və təchizatının xüsusi çəkisi 5,1 faiz təşkil edib (11,6 faiz artımla), su sektoru, yağış sularının və tullantıların təmizləməsinə 0,6 faiz (1,3 faiz artımla) düşür.
