Azərbaycan, Bakı, 28 noyabr /Trend, müxbir T.Cəfərov/
Astara sərhəd-keçid məntəqəsindən cari ilin səkkiz ay ərzində (İranda il martın 21-də dəyişir) 99 milyon 399 min 750 dollar dəyərində kənd təsərrüfatı məhsulları digər ölkələrə ixrac olunub. Bunu İranın Kənd Təsərrüfatı Nazirliyinin Astara şəhər üzrə nümayəndəsi İrəc Şiyarkar deyib. Trend-in məlumatına görə, bu barədə İRNA agentliyi xəbər verir.
İ.Şiyarkarın sözlərinə görə, Astara sərhəd-keçid məntəqəsi vasitəsi ilə bu müddət ərzində İrandan Azərbaycana, Rusiyaya, Gürcüstana, Ukraynaya və digər ölkələrə 31 növdə 111 751 ton kənd təsərrüfatı məhsulu ixrac olunub.
Onun sözlərinə görə, ixrac olunan məhsullar əsasən kartof, kişmiş, kələm, alma, göyərti, üzüm, qarpız, xurma və püstə olub: "Ötən ilin eyni dövrü ilə müqayisədə ixrac olunan məhsullar həcminə görə 8 faiz, dəyərinə görə isə 11 faiz artıb".
İ.Şiyarkar bildirib ki, bu müddət ərzində Rusiya və Gürcüstandan Astara sərhəd-keçid məntəqəsi vasitəsi ilə 67 min 608 ton taxta, buğda kəpəyi, banan, pambıq toxumu və s. bu kimi məhsullar idxal olunub.
O bildirib ki, səkkiz ay ərzində Astara sərhəd-keçid məntəqəsi vasitəsi ilə 9 min 606 ton məhsul daşınıb ki, bu da ötən ilin eyni dövrü ilə müqayisədə 28 faiz çoxdur.