Azərbaycan, Bakı, 18 dekabr /Trend, müxbir A.Axundov/
Azərbaycan hökumətinin iqtisadi islahatların aparılması üzrə səyləri çərçivəsində əsas addımlardan biri ölkənin Ümumdünya Ticarət Təşkilatına (ÜTT) daxil olması ola bilər. Trend-in məlumatına görə, bunu ABŞ-ın Azərbaycandakı səfiri Riçard Morninqstar çərşənbə günü Xəzər Avropa İnteqrasiya İşgüzar Klubunun (CEIBC) üzv şirkətləri ilə görüşdə çıxışı zamanı deyib.
Görüş "Azərbaycan-ABŞ münasibətlərinin genişləndirilməsi imkanlarının nəzərdən keçirilməsi, həmçinin ABŞ şirkətlərinin Azərbaycanda və Azərbaycan şirkətlərinin ABŞ-da fəaliyyətinin genişləndirilməsi" mövzusuna həsr edilmişdi.
Səfir qeyd edib ki, ABŞ Azərbaycanın bu təşkilata üzv olması yolunda səylərini dəstəkləyir:
"Hökumətin səylərinə baxmayaraq, bu yolda hələ də maneələr var. Vaşinqton həmin maneələrin aradan qaldırılması üçün Azərbaycana bürokratik prosedurların sadələşdirilməsi, dövlət strukturlarının fəaliyyətinin səmərəliliyinin və iqtisadiyyatın şəffaflığının artırılması, kiçik və orta sahibkarlığın inkişafı üçün imkanların yaxşılaşdırılması üzrə işləri davam etdirməyi tövsiyə edir".
R.Morninqstarın sözlərinə görə, Azərbaycan son illər çox böyük uğurlar qazanıb: "Bu uğurların davam etdirilməsi üçün Azərbaycan insan amilini inkişaf etdirməlidir. Azərbaycan əhalisi gənc və çox istedadlıdır. Hazırda yenidən formalaşdırılan təhsil sistemi bu istedadların imkanlarından istifadə edilməsi üçün şərait yaratmalıdır".
