Azərbaycan, Bakı, 12 mart /Trend, müxbir A.Axundov/
Azərbaycan hökumətinin suveren avrobondlarının uğurlu buraxılışı dünyanın Azərbaycan iqtisadiyyatına etimadının yaxşı indikatorudur. Bunu çərşənbə günü Trend-ə Dünya Bankının (DB) Cənubi Qafqaz üzrə regional direktoru Henri Kerali deyib.
Onun sözlərinə görə, bu o deməkdir ki, xaricdəki maliyyə bazarları Azərbaycanı investisiya yatırmağın və gəlirlər əldə etməyin mümkün olduğu etibarlı tərəfdaş və ölkə hesab edirlər: "Bu, Azərbaycan üçün müsbət addımdır".
H.Kerali qeyd edib ki, bu, həmçinin Azərbaycanda yaxşı makroiqtisadi vəziyyəti və artım üçün potensialı əks etdirir: "Sonuncu olmadan ölkəyə investisiyalar daxil olmazdı".
Qeyd edək ki, Azərbaycan ötən gün 1,25 milyard dollar dəyərində avrobondların debüt buraxılışını yerləşdirib. İstiqrazlar beş faiz gəlirliliklə və 10 il ödəmə müddəti ilə buraxılıb.
