Azərbaycan, Bakı, 21 may /Trend, müxbir E.Əliyev/
Dövlət Gömrük Komitəsi (DGK) müstəqil iqtisadi operatorlar institutunun tətbiqi üzərində işi davam etdirir. Bunu çərşənbə günü Trend-ə DGK sədri Aydın Əliyev deyib.
O bildirib: "Biz İsveçin "KHG Services" şirkəti ilə müqavilə bağlamışıq. Şirkət bu layihənin reallaşdırılmasında bizə kömək edir. İş 5 mərhələdən ibarətdir. Normativ hüquqi bazanın araşdırılmasından ibarət olan birinci mərhələ artıq uğurla yekunlaşdırılıb".
A.Əliyevin sözlərinə görə, hazırda şirkət risk operatorlarının fəaliyyəti ilə bağlı qiymətləndirmə üzrə təkliflər hazırlayır.
Qeyd edək ki, səlahiyyətli iqtisadi operatorlar beynəlxalq ticarətin sadələşdirilməsində və onun təhlükəsizliyinin təmin edilməsində əhəmiyyətli rol oynayır.
