Azərbaycan, Bakı, 30 iyul /Trend, müxbir Emil İsmayılov/
Dünya Bankı (DB) Azərbaycanda yeni "Regional yollar" layihəsinin reallaşdırılması üçün maliyyə vəsaitinin həcmini 250 milyon dolllaradək artırmağa hazırdır. Trend-in məlumatına görə, bu barədə bankın saytında dərc olunan layihə konsepsiyasında deyilir.
Bank daha əvvəl Azərbaycanın cənubunda avtomobil yollarının yenidən qurulmasını nəzərdə tutan layihəyə 200 milyon dollar ayırmağı planlaşdırırdı.
Konsepsiyaya əsasən, layihənin ümumi dəyəri 368,33 milyon dollardır. Bu vəsaitin 250 milyon dolları DB qrupuna daxil olan Beynəlxalq Yenidənqurma və İnkişaf Bankının xətti ilə ayrılacaq.
Bu vəsaitin 100 kilometr uzunluğunda 2 regional yol sahəsinin və onlara bitişik yerli təyinatlı yolların yenidən qurulmasına ayrılması planlaşdırılır. Kredit resursları iki əsas sahənin yenidən qurulmasına ayrılacaq ki, bunlar da Şirvan-Noxudlu-Salyan (41 kilometr) və Salyan-Neftçaladır (43 kilometr).
Layihə çərçivəsində, həmçinin texniki nəzarət üzrə məsləhətləşmələr nəzərdə tutulub.
Konsepsiyada qeyd edilir ki, bankın Direktorlar Şurasında kredit ayrılmasının bəyənilməsi bu il oktyabrın 16-da gözlənilir.