Azərbaycan, Bakı, 7 avqust /Trend, müxbir Təmkin Cəfərov/
"İran və Azərbaycan arasında gömrük sahəsində əməkdaşlığı artırmaq üçün yeni sazişin imzalanması zəruridir və biz razılığa gəlmişik ki, bu sazişi yaxın vaxtlarda imzalayaq. Bunu Trend-ə cümə axşamı İranın Gömrük Xidməti rəisinin beynəlxalq məsələlər üzrə müavini Əhəd Paraham deyib.
Ə.Paraham bildirib ki, İran və Azərbaycan arasında gömrük sahəsində əməkdaşlıq sazişi 2002-ci ildə imzalanıb: "O vaxtdan indiyədək iki ölkə arasında gömrük sahəsində yeni əməkdaşlıq sazişi imzalanmayıb. Ona görə də biz bu sazişi 2014-cü ildə Ümumdünya Gömrük Təşkilatının sazişi əsasında (GATT) təzələmək istəyirik".
O əlavə edib ki, iki ölkə elektron gömrük sahəsində əməkdaşlıqlarını artırmaq istəyir və bu imzalayacağımız yeni sazişdə öz əksini tapacaq: "Biz həmçinin Azərbaycanla vahid pəncərə sistemini istifadə etmək istəyirik. Qərara alınıb ki, Azərbaycanın və İranın statistika mərkəzləri danışıqlar aparsın və sərhədlərdə vahid pəncərə sistemi tətbiq olunsun".
O əlavə edib ki, vahid pəncərə sisteminin tətbiqi ilə Azərbaycan tərəfinin qəbul etdiyi hər hansı bir sənəd və ya bəyanatı İran gömrüyü, eləcə də İran gömrüyünün sənəd və bəyanatlarını Azərbaycan gömrüyü qəbul edəcək və bu yükdaşımaları daha da sadələşdirəcək.
Ə.Paraham Biləsuvar sərhəd keçid məntəqəsinin bundan sonra sərnişinlər üçün 24 saat ərzində fəaliyyət göstərəcəyini deyib və bildirib ki, yaxın gələcəkdə Astara sərhəd keçid məntəqəsi də 24 saatlıq iş rejiminə keçəcək.
