Azərbaycan, Bakı, 7 avqust /Trend, müxbir İlahə Məmmədli/
Dünya Bankı (DB) Azərbaycanda ali təhsilin inkişaf layihəsinin reallaşdırılmasına 33 milyon dollar ayırmağı planlaşdırır. Trend-in məlumatına görə, bu barədə cümə axşamı bankın hesabatında deyilir.
Heasabata əsasən, layihənin qiymətləndirilməsinin yekunlaşdırılmasının ilkin müddəti 2014-cü il noyabrın 21-nə müəyyənləşdirilib, DB-nin Direktorlar Şurasında kreditin bəyənilməsi isə 15 fevral 2015-ci il tarixində baş tutacaq.
Layihənin ümumi dəyəri 40,5 milyon dollardır. Layihə 4 komponentdən ibarətdir: ali təhsil sisteminin möhkəmləndirilməsi; ali məktəblərin potensialının gücləndirilməsi; seçilmiş regionda ali təhsilin keyfiyyətinin və bura girişin möhkəmləndirilməsi; layihənin idarə edilməsi, monitorinq və qiymətləndirmə.
DB Azərbaycanda təhsil sahəsində 3 layihəni maliyyələşdirib.
Azərbaycanın təhsil sistemində islahatlar strategiyası 250 milyon dollar həcmində qiymətləndirilir.
