Azərbaycanda 36 min nəfərdən çox işsiz qeydiyyata alınıb

Azərbaycan, Bakı, 18 avqust /Trend, müxbir Hüseyn Vəliyev/

Avqustun 1-nə olan vəziyyətə görə, Azərbaycanda işsiz qismində 36,7 min nəfər rəsmi qeydiyyatdan keçib ki, onlardan 40,7 faizi qadındır. Trend-in məlumatına görə, bu barədə Dövlət Statistika Komitəsinin hesabatında deyilir.

2014-cü ilin əvvəlindən ölkədə işsizlərin sayı cüzi artıb (bu il yanvarın 1-nə işsiz kimi 36 206 nəfər qeydiyyata alınıb).

Hesabata əsasən, Azərbaycanda işsizliyə görə müavinətin orta məbləği 274,4 manat olub.

2014-cü il avqustun 1-nə işsizlərin və işsizliyə görə müavinət alanların ayrı-ayrı şəhər və rayonlar üzrə bölgüsü (nəfər):

Hesabata görə, 2014-cü il avqustun əvvəlinə ölkənin əmək qabiliyyətli əhalisinin sayı 4803,4 min nəfər təşkil edib ki, bunların 4565,6 min nəfəri əmək fəaliyyəti ilə məşğul olub. 2014-cü ilin avqustun 1-nə olan vəziyyətə görə, muzdla işləyənlərin sayı 1510,9 min nəfər olub. Muzdla çalışanların ümumi sayından 891,6 mini dövlət sektorunda, 619,3 min nəfəri isə özəl sektorda çalışıb.

Bununla yanaşı, neft sektorunda çalışanların sayı 37,2 min nəfər, qeyri-neft sektorunda isə 1473,7 min nəfər təşkil edir. Azərbaycanda qeyri-kənd təsərrüfatı sahəsində çalışanların sayı 1466,1 min nəfərdir.

Muzdla işləyənlərin 22,6 faizi istehsalat sahəsində çalışıb. Onlardan 7 faizi tikintidə, 6,6 faizi emal sənayesində, 2,9 faizi kənd və meşə təsərrüfatı, balıqçılıq sahəsində, 2,45 faizi hasilat, 1,9 faizi elektrik enerjisi, qaz sahəsində, 1,7 faizi su təchizatı, çirkab suların təmizlənməsi sahəsində çalışır.

Hesabatda deyildiyi kimi, xidmət sahəsinə gəlincə, bu sahədə çalışanların 22,3 faizi təhsil, 18,7 faizi topdan satış, nəqliyyat vasitələrinin təmiri, 8,7 faizi səhiyyə və sosial xidmətlər, 6,6 faizi dövlət idarəsi və müdafiə, sosial təminat, 5,1 faizi nəqliyyat və anbar təsərrüfatı, 3,8 faizi istirahət, əyləncə və incəsənət, 3,6 faizi peşə, elmi və texniki fəaliyyət, 1,9 faizi maliyyə və sığorta fəaliyyəti, 1,7 faizi informasiya və rabitə, 1,6 faizi inzibati və yardımçı xidmətlər, 1,4 faizi turistlərin yerləşdirilməsi və ictimai iaşə, 1,1 faizi digər sahələrdə, eləcə də 0,9 faizi daşınmaz əmlak əməliyyatlarında işləyir.